ចង់និយាយថា ប្រហុកហ្នឹង ស្អុយក៏ស្អុយ តែឆ្ងាញ់ក៏ឆ្ងាញ់! ហើយបើយើងយកមកច្នៃជាម្ហូប ដឹងតែញ៉ាំថែមបាយមិនតិចចានទេ៎! អ៊ីចឹងយើងទៅមើលមុខម្ហូប ដែលអាចធ្វើបានជាមួយប្រហុកខាងក្រោមនេះ ជាមួយ FoodBuzz ទាំងអស់គ្នា!

ចង់ប្រាប់ឲ្យហើយដែរថា ម្ហូបភាគច្រើន គឺញ៉ាំផ្ទាប់ជាមួយនឹងបន្លែ ដែលអាចដាក់បានតាមចំណូលចិត្ត រួមមានដូចជា ស្ពៃក្តោប ត្រសក់​ ការ៉ុត ត្រប់ ពពាយ ប៉េងប៉ោះ ត្រកួន ពោតបារាំង និងសណ្តែកកួរជាដើម។

***មុននឹងដាក់ចម្អិន យកល្អ គួរតែលាងប្រហុកជាមុនសិន ដើម្បីកាត់បន្ថយជាតិប្រៃ

#1 ប្រហុកលីងអំពិលទុំសាច់ជ្រូកចិញ្ច្រាំ

>>> គ្រឿងផ្សំ៖ ខ្ទឹមស-ក្រហម ម្ទេស អំពិលទុំ​ សាច់ជ្រូកចិញ្ច្រាំ (សាច់សុទ្ធ ឬ សាច់ 3 ជាន់) ប្រហុក ស្ករក្រហម 

របៀបធ្វើ៖

- លីងខ្ទឹមស-ក្រហម និងម្ទេសឲ្យឈ្ងុយ រួចទុកមួយឡែក (បើមានត្រប់ ក៏អាចដាក់បាន)

- ឆាខ្ទឹមស និងម្ទេសហាន់​ (បើមិនចូលចិត្តហឹរ មិនចាំបាច់ដាក់ទេ) ឲ្យឈ្ងុយ រួចដាក់ប្រហុកចិញ្ច្រាំ/កិនចូល ឆាឲ្យឈ្ងុយ

- ដាក់សាច់ជ្រូកចិញ្ច្រាំចូល ឆារហូតជិតឆ្អិន សឹមចាក់ស្ករក្រហម និងសាច់អំពិលទុំ (លាយជាមួយទឹកក្តៅ ហើយយកគ្រាប់ចេញ) ចូល 

- ឆារហូតដល់ឡើងគោក និងឆ្អិនល្អ។

***បើចូលចិត្តបែបរាវៗ ហើយចង់ញ៉ាំប្រហុកខ្ទិះ អាចដាក់ខ្ទិះដូចចូលបន្ថែមបាន

#2 ប្រហុកឆៅចិញ្ច្រាំក្រសាំង

>>> គ្រឿងផ្សំ៖ ប្រហុក ក្រសាំង ខ្ទឹមស-ក្រហម ម្ទេស គល់ស្លឹកគ្រៃ ស្លឹកក្រូចសើច ជីគ្រប់មុខ ស្លឹកខ្ទឹម ស្ករស ម្សៅស៊ុប ក្រូចឆ្មារ

>>> របៀបធ្វើ៖

- ចិញ្ច្រាំប្រហុកឲ្យម៉ដ្ឋ ហើយដាក់សាច់ក្រសាំង ម្ទេស ខ្ទឹមស-ក្រហម គល់ស្លឹកគ្រៃ ស្លឹកក្រូចសើច ចិញ្ច្រាំចូលគ្នាឲ្យម៉ដ្ឋ

- ដាក់ស្ករស ម្សៅស៊ុប ជីគ្រប់មុខ ស្លឹកខ្ទឹមចូលចិញ្រ្ចាំជាមួយគ្នាដែរ

- ភ្លក្សមើលតាមរសជាតិដែលចង់បាន (បើស្ទើរជូរ អាចថែមក្រូចឆ្មារបាន) ។

#3 ប្រហុកអាំង

>>> គ្រឿងផ្សំ៖ ប្រហុក សាច់ជ្រូក 3 ជាន់​ ក្រសាំង ខ្ទឹមស-ក្រហម ម្ទេស គល់ស្លឹកគ្រៃ ស្លឹកក្រូចសើច ស្ករស ម្សៅស៊ុប 

>>> របៀបធ្វើ៖

- ចិញ្ច្រាំប្រហុកឲ្យម៉ដ្ឋ រួចដាក់សាច់ជ្រូក 3 ជាន់ចិញ្ច្រាំជាមួយគ្នា

- បុកគល់ស្លឹកគ្រៃ និងស្លឹកក្រូចសើច ឲ្យម៉ដ្ឋ រួចដាក់ចូលចិញ្ច្រាំជាមួយនឹងក្រសាំង ខ្ទឹមស-ក្រហម

- ដាក់ម្ទេស ស្ករស និងម្សៅស៊ុប តាមរសជាតិចង់បាន

- ខ្ចប់ប្រហុកជាមួយនឹងស្លឹករមៀត រួចរុំស្លឹកចេកពីលើ

- ដាក់អាំងប្រហែល 20 នាទី (ប្រើភ្លើងតិចៗ)។

***អាចដាក់អាំង ឬដុតលើជ្រុញ បើសិនមិនចង់ខ្ចប់ជាមួយស្លឹកចេក និងរមៀតទេ៎

#4 ប្រហុកចំហុយ

>>> គ្រឿងផ្សំ៖ ប្រហុក សាច់ជ្រូក 3 ជាន់ ខ្ទឹមស ស៊ុត ស្ករស ម្សៅស៊ុប ស្លឹកខ្ទឹម ម្ទេស

>>> របៀបធ្វើ៖

- ចិញ្ច្រាំប្រហុក រួចដាក់សាច់ជ្រូក៣ជាន់ និងខ្ទឹមសចូលដែរ ដោយចិញ្ច្រាំឲ្យម៉ដ្ឋល្អ

- ដាក់ស៊ុត ស្ករស ម្សៅស៊ុបចូល (បើខាប់ពេក អាចថែមទឹកបន្តិច)

- ដាក់ស្លឹកខ្ទឹម និងម្ទេសចូល ហើយកូរចូលគ្នាឲ្យសព្វ

- ដាក់ចំហុយប្រហែល 15 នាទី។

#5 ប្រហុកកប់គ្រឿង​(ខ្នប់) អាំង

>>> គ្រឿងផ្សំ៖ សាច់ជ្រូក 3 ជាន់ កូនត្រី កំពឹស គ្រឿង ផ្សិតចំបើង ក្រសាំង ប្រហុក ស្ករស ម្សៅស៊ុប ស្លឹកម្រះព្រៅ ម្ទេស

របៀបធ្វើ៖ 

- សម្អាតកូនត្រីដោយវះយកអាចមន៍វាចេញពីពោះ កាត់ព្រុយកំពឹសចេញ ហើយលាងទឹកឲ្យស្អាត

- បុកគ្រឿង ហើយចិញ្ច្រាំប្រហុក និងសាច់ជ្រូកឲ្យម៉ដ្ឋ រួចចាប់ដាក់ចានធំមួយ

- ដាក់គ្រឿងផ្សំទាំងអស់ ច្របល់ចូលគ្នាឲ្យសព្វល្អ 

- ដួសដាក់លើស្លឹកចេក ហើយខ្ចប់ឲ្យជិតស្អាត

- ដាក់អាំងឲ្យឆ្អិនល្អ។

#6 ខប្រហុក

>>> គ្រឿងផ្សំ៖ សាច់ជ្រូក 3 ជាន់ ប្រហុក ត្រីអណ្តែង ខ្ទឹមស ត្រប់ពុតលំញង ម្ទេស ស្លឹកក្រូចសើច ស្ករស/ក្រហម ម្សៅស៊ុប

>>> របៀបធ្វើ 

- ចិញ្ច្រាំសាច់ជ្រូក 3 ជាន់ និងប្រហុកឲ្យម៉ដ្ឋ រួចទុកមួយឡែកសិន

- បំពងត្រីឲ្យឆ្អិន និងស្រួយល្អ 

- លីងខ្ទឹមស ត្រប់ ម្ទេស និងស្លឹកក្រូចសើចឲ្យឈ្ងុយ 

- ដាក់ឆាប្រហុក និងសាច់ជ្រូកចិញ្ច្រាំ រហូតដល់សព្វសាច់

- ដាក់ត្រីចូល រួចដាក់ទឹកបន្តិចដែរ

- ដាក់គ្រឿងផ្សំផ្សេងទៀតចូល ហើយរម្ងាស់ឲ្យឆ្អិនសាច់ត្រី។ 

#7 ទឹកប្រហុកឆៅ (ទឹកជ្រលក់)

>>> គ្រឿងផ្សំ៖ ប្រហុក ទឹកក្រូចឆ្មារ ខ្ទឹមស ម្ទេស រំដេង គល់ស្លឹកគ្រៃ ខ្ទឹមក្រហម ស្លឹកក្រូចសើច និងទឹក​ ឬ ទឹកដោះគោ សណ្តែកដីលីង

- ចិញ្ច្រាំប្រហុកឲ្យម៉ដ្ឋ 

- បុកខ្ទឹមស និងម្ទេសចូលគ្នា ហាន់រំដេង-គល់ស្លឹកគ្រៃ-ខ្ទឹមក្រហម ជាចំណិតតូចៗ និងស្លឹកក្រូចសើច ជាសរសៃៗ

- លាយគ្រឿងផ្សំទាំងអស់ ចូលគ្នាឲ្យសព្វ (យករសជាតិប្រៃ-ជូរ) ។

អូ! នៅមានមួយទៀត គឺ «ទឹកប្រហុកជ្រលក់ជាមួយនឹងម្ជូរ» ដែលអាចអានបានតាមរយៈ លីង