មានស្វាយ មានម្នាស់ មានគ្រប់សព្វ តែខ្វះតែម្យ៉ាងនោះគឺ ទឹកជ្រលក់។ អត់តិចម្ជូរគេ ទិញតែទឹកជ្រលក់ដូចមិនសម ហើយបើតិចទាំងម្ជូរទៀត សល់ម្ជូរនៅផ្ទះហើយអស់លុយទៀត។ ម៉ោះ មករៀនធ្វើទឹកជ្រលក់ទុកញ៉ាំជាមួយស្វាយ ឬ ម្ជូរនៅផ្ទះរបស់អ្នក។ ធ្វើហើយច្រកដាក់ក្រឡ ឬ កែវទុក មិនងាយខូច ហើយចង់ញ៉ាំពេលណា ចាប់ដាក់កូនចានតែបន្តិចជាការស្រេច!!!

#1 ទឹកប្រហុក 

គ្រឿងផ្សំ ៖ ប្រហុក ខ្ទឹមស ម្ទេស ស្ករក្រហម

- ចិញ្រ្ចាំប្រហុកឲ្យម៉ដ្ឋ ជាមួយនឹងម្ទេស និងខ្ទឹមស

- ដាក់លាយជាមួយស្ករក្រហម (ដាក់ម្សៅស៊ុបបន្តិចយករសជាតិបន្ថែមក៏បាន)

***សម្រាប់អ្នកចង់ញ៉ាំឆៅ គ្រាន់តែលាយធម្មតាប៉ុណ្ណឹងជាការស្រេច។ សម្រាប់អ្នកចង់ញ៉ាំឆ្អិន អាចកម្លោចស្ករក្រហមជាមុនសិន ហើយសឹមដាក់ប្រហុកចិញ្រ្ចាំចូល ហើយកូរមួយសន្ទុះលើភ្លើង។

#2 ទឹកកាពិ

គ្រឿងផ្សំ៖ កាពិ ម្ទេស(ម្ទេសស្រស់ក៏បាន ម្ទេសហុយក៏បាន) ស្ករក្រហម ម្សៅស៊ុប ខ្ទឹមស-ក្រហម បង្គាក្រៀម

>>>វិធីទី១

- ដាក់ទឹកបន្តិចលើខ្ទះ ឬ ឆ្នាំងហើយទុកឲ្យពុះ សឹមដាក់ស្ករក្រហមចូល រួចកូរឲ្យឡើងពណ៌ជើងអង្ក្រង

- ដាក់កាពិចូល ជា​មួយនឹងម្ទេស ម្សៅស៊ុប ខ្ទឹមក្រហម (ហាន់ជាចំណិតស្តើងៗ) និងបង្គាក្រៀម

- កូរឲ្យសព្វ ហើយទុករំងាស់ឲ្យពុះល្អ។

>>>វិធីទី២ (បែបថៃ)

-បុកម្ទេសក្រៀមឲ្យម៉ដ្ឋ ចិញ្ច្រាំខ្ទឹមស និងហាន់ជាខ្ទឹមក្រហមជាចំណិតស្តើងៗ

-លីងខ្ទឹមស ខ្ទឹមក្រហម និងម្ទេសស្រស់ ឲ្យឡើងឈ្ងុយ ហើយដាក់កាពិចូល  រួចកូររហូតដល់ពុះ

-ដាក់ម្សៅស៊ុប ស្ករក្រហម ម្ទេសហុយ និងបង្គាក្រៀមដែលបុកហើយចូលក្នុង ហើយកូររំងាស់មួយសន្ទុះជាការស្រេច។

#3 អំបិលម្ទេសបុក

គ្រឿងផ្សំ៖ កាពិ ម្ទេស(ម្ទេសស្រស់ក៏បាន ម្ទេសហុយក៏បាន) ស្ករក្រហម ម្សៅស៊ុប ខ្ទឹមស-ក្រហម បង្គាក្រៀម

គ្រាន់តែបុកគ្រឿងទាំងអស់ចូលគ្នា (ខ្ទឹមសដាក់ក៏បាន មិនដាក់ក៏បាន) ឲ្យម៉ដ្ឋ

#4 អំបិលម្ទេសបង្គាក្រៀម

គ្រឿងផ្សំ៖ អំបិល ស្ករស ម្សៅស៊ុប បង្គាក្រៀម ម្ទេស ខ្ទឹមស

>>>វិធីទី 1

- លាយគ្រឿង (អំបិល ស្ករស ម្សៅស៊ុប ម្ទេសហុយ បង្គាក្រៀម) ចូលគ្នា ភ្លក្សមើលល្មម សឹមដាក់លីងឲ្យឡើងក្រៀម និងឈ្ងុយ

>>>វិធីទី 2

- លីងអំបិល រួចលើកចេញ ហើយលីងបង្គាក្រៀមម្តង

- បុកម្ទេស និងខ្ទឹមសឲ្យម៉ដ្ឋ ហើយដាក់គ្រឿង (ស្ករស ម្សៅស៊ុប) ឲ្យរាងម៉ដ្ឋល្មមហើយ សឹមដាក់បង្គាក្រៀមចូល បុកបន្ថែមបន្តិចទៀត។

#5 ទឹកត្រីស្ករ

គ្រឿងផ្សំ៖ ទឹកត្រី ស្ករក្រហម ម្ទេស

លាយទឹកត្រី ជាមួយនឹងស្ករក្រហម (ស្ករត្នោត) ហើយដាក់ម្ទេសចូលជាមួយ លាយចូលគ្នាឲ្យសព្វ

#6 ទឹកត្រីបង្គាក្រៀម

គ្រឿងផ្សំ៖ ទឹកត្រី ម្ទេស (ម្ទេសស្រស់ក៏បាន ម្ទេសហុយក៏បាន) ស្ករក្រហម ម្សៅស៊ុប ក្រហម បង្គាក្រៀម

- កូរស្ករក្រហមឲ្យឡើងជើងអង្ក្រង រួចចាក់ទឹកត្រីចូល រម្ងាស់ឲ្យពុះ

- ដាក់បង្គាក្រៀម ម្ទេស (ម្ទេសស្រស់ហាន់ល្អិតៗ ឬ ក៏ម្ទេសហុយ) គ្រឿង (ស្ករស ម្សៅស៊ុប) ខ្ទឹមក្រហម(ហាន់ជាចំណិតស្តើងៗ)។

#7 អំបិលម្សៅស៊ុប

គ្រឿងផ្សំ៖ ម្សៅស៊ុប ស្ករស ម្ទេស

ងាយជាងគេ គឺគ្រាន់តែលាយម្សៅស៊ុបខ្នរ ឬ រ៉តឌី ជាមួយនឹងស្ករ និងម្ទេស រួចបុកឲ្យម៉ដ្ឋជាការស្រេច!