ស្រយាល៖ ហាងកាហ្វេបើកថ្មីជាយក្រុងភ្នំពេញ បរិយាកាសស្រស់ស្រាយ ធំទូលាយនិងការរចនាប្លែកភ្នែក ប្លែកអារម្មណ៍

២១ តុលា ២០២១

ស្រយាល ជាហាងកាហ្វេមួយកន្លែងដែលទើបនឹងបើកដំណើរការថ្មីនៅខេត្តកណ្ដាល មិនឆ្ងាយពីភ្នំពេញប៉ុន្មាន។ ថ្វីត្បិតតែទើបនឹងបើកពិតមែន តែស្រយាលបានទាក់ទាញអ្នកទៅបានជាច្រើននាក់ពិសេសអ្នកជិះកង់ ហើយក៏មានអ្នករៀបគម្រោងប៉ងចង់ទៅជាច្រើនដែរ។

ម្ចាស់ហាងរបស់ស្រយាលមានបំណងចង់ឲ្យអតិថិជនខ្លួនញ៉ាំកាហ្វេរំសាយអារម្មណ៏ពីទុក្ខកង្វល់ផ្សេងៗនៅក្នុងបរិយាកាសស្ងប់ស្ងាត់បែបធម្មជាតិ ឆ្ងាយពីសម្លេងរំខាននៃទីក្រុង ជាការគេចពីអារម្មណ៍ស្មុគស្មាញបានមួយរំពេច។

ហាងកាហ្វេស្រយាលមានបម្រើភេសជ្ជៈជាច្រើនមុខរួមមានកាហ្វេក្នុងស្រុក និងមានអាហារឆ្ងាញ់ៗជាច្រើន មានទាំងបែបអាសុី បែបអុឺរ៉ុប ជ្រើសរើសបានតាមចំណូលចិត្ត។ ស្រយាលក៏មានការរចនាឡើងបែបទាន់សម័យ និងមានកន្លែងអង្គុយនៅខាងក្រៅ ដើម្បីស្រូបយកខ្យល់អាកាសធម្មជាតិស្រស់ស្រាយក្នុងចិត្ត។ ម្យ៉ាងទៀត អ្នកចូលចិត្តថតរូប ដឹងតែពេញចិត្តស្តូកជាមួយកន្លែងនេះហើយ ព្រោះកន្លែងស្អាត មានពន្លឺធម្មជាតិគ្រប់គ្រាន់ សម្បូរប្លង់ថតតែម្ដង!