អារ៉ាប៊ីកា (%​​Arabica) មានប្រភពមកពីទីក្រុងក្យូតុ ប្រទេសជប៉ុន ហាងកាហ្វេនេះទទួលបានការស្វាគមន៍និងពេញនិយមនៅបណ្តាប្រទេសជាច្រើន។​​ %​​ Arabica មកដល់កម្ពុជា ក្នុងផ្សារទំនើប វឌ្ឃនៈកាពីតាល​ ត្រឹមរយៈពេលយ៉ាងខ្លី និងទទួលបានការចូលចិត្ត ហើយបានក្លាយទៅជាទិសដៅពេញនិយមមួយសម្រាប់អ្នកពិសាកាហ្វេ និងអ្នកចូលចិត្តថតរូបផុសក្នុងបណ្តាញសង្គម Facebook និង Instagram។​

បច្ចុប្បន្ន %​​ Arabica មានសាខាចំនួន 58 ទូទាំងពិភពលោកដូចជា​ជប៉ុន សឹង្ហបុរី ចិន ថៃ អង់គ្លេស បារាំង និង​អារ៉ាប់រួម ជាដើម។ ចំនុចដែលគួរឲ្យចាប់អារម្មណ៍ខ្លាំងបំផុតនោះគឺ រចនាបថតុបតែងដែលមានរាងតូចច្រឡឹងរៀបចំឡើងយ៉ាងទាក់ទាញពណ៌សលាយគគីលក្ខណៈបែបសាមញ្ញងាយៗ (Minimalism)។​ 

ហាងកាហ្វេពេញនិយមបំផុតសម្រាប់អ្នកលេងបណ្ដាញសង្គម Instagram មួយនេះភាគច្រើនជាហាងទិញហើយចាកចេញ (Take Away)  ប៉ុន្តែ %​​ Arabica ក្នុងផ្សារទំនើបវឌ្ឍនៈកាពីតាល​មានផ្តល់ជូនកន្លែងអង្គុយ ដែលលោកអ្នកអាចបណ្តែតអារម្មណ៍ជាមួយទេស​​ភាពសួនច្បារ និងទិដ្ឋភាពទីក្រុងខណៈពេលក្រេបរសជាតិភេសជ្ជៈរបស់ខ្លួន។​

មិនខុសពីសាខាដទៃទៀតដែរ %​​ Arabica ភ្នំពេញមានបន្ទប់លីងកាហ្វេផ្ទាល់ខ្លួន​ ដើម្បីផលិតគ្រាប់កាហ្វេថ្មីៗ ស្រស់ៗ ជារៀងរាល់ថ្ងៃ ជាពិសេសគ្រាប់កាហ្វេទាំងអស់ត្រូវបាននាំចូលពីប្រទេស អេត្យូពី ប្រេស៊ីល នីការ៉ាហ្គ័ កូស្តារីកា និងបណ្តាប្រទេសជាច្រើនទៀត។ ជាងនេះទៅទៀត %​​ Arabica ក៏មានចម្ការកាហ្វេផ្ទាល់ខ្លួនផងដែរដែលមានទីតាំងនៅ កោះហាវ៉ៃ។

ភេសជ្ជៈប្រចាំហាងដែលពេញនិយមបំផុតគឺ​ Caffe Latte និង Matcha Latte ។ ​ក្រៅពីភេសជ្ជៈទាំង 2 មុខនេះ Spanish Latte ក៏នឹងធ្វើឲ្យអ្នកជាប់ចិត្តជាមួយរសជាតិ និងក្លិនដ៏ឈ្ងុយរបស់វាផងដែរ។​ មិនត្រឹមតែប៉ុណ្ណោះ %​​ Arabica ក៏មានភេសជ្ជៈគ្មានជាតិកាហ្វេអ៊ីនផ្សេងទៀតដូចជា Lemonade Sparkling ពិសេសប្រភេទ​ ម៉ាឆា ដែលម៉្សៅរបស់វាត្រូវបានផលិតផ្ទាល់ពី %​​ Arabica ក្យូតុ។​

ជាងនេះទៅទៀតហាងក៏មានដាក់តាំងលក់សម្ភារៈប្រើប្រាស់របស់ %​​ Arabica ដូចជាកែវកាហ្វេ ដបទឹក កាបូប ឆ័ត្រ ជាដើម ដែលធ្វើឡើងយ៉ាងសាមញ្ញតែទាក់ទាញជាមួយនឹងស្លាកសញ្ញា %​។​ 

អ្នកចូលចិត្តកាហ្វេបែបស៊ីវិល័យគួរតែកុំមើលរំលងកន្លែងដែលមានរសជាតិកាហ្វេឆ្ងាញ់ ក្នុងបរិយាកាសបែបទាន់សម័យនេះ។  ព័ត៌មានលម្អិត អ្នកអាចតាមដានបណ្ដាញសង្គមផ្លូវការ FACEBOOK: Arabica Cambodia ,​ Vattanac Capital និង Instagram: @arabica.cambodia @vattanaccapital