ម៉ោះកនយើង! ណាគេខ្លះនិយមស្នេហាសាច់អាំង? ហើយក្នុងចំណោមសាច់អាំង​បែបជប៉ុន ថៃ កូរ៉េ ខ្មែរ បច្ចឹមប្រទេស និងផ្សេងៗទៀត សាច់អាំងប្រភេទណាដែលអ្នកទាំងអស់គ្នាចូលចិត្តទៅញុាំជាងគេ?

ប្លែកហា៎ណា៎! នៅបឹងត្របែកយើងឥឡូវមានជាហាងសាច់អាំងបែបជប៉ុនកាត់ថៃ ដែលមានការរចនាតុបតែងហាងបែបប្រទេសជប៉ុនបុរាណ ជាមួយផ្ទាំង Poster ប្លែកស្អាតៗកាលពីសម័យមុននៅកន្លែងដែលភ្ញៀវអង្គុយ។ ក៏ដូចជានៅខាងក្រៅមានជាគោមបុរាណ តុកៅអីឈើ និងខ្សែររំយោលតុបតែងតាមការរចនាបែបប្រទេសជប៉ុនដូចគ្នា។

ប្រិយមិត្តទាំងអស់គ្នានឹងប្លែកមាត់ជាមួយហាងសាច់អាំង Wagyu Gang Yakiniku ដែលមានសាខានៅបឹងត្របែកមួយនេះ។​ នៅទីនេះគឺគេផ្តោតសំខាន់ទៅលើគុណភាពសាច់ ជាប្រភេទសាច់គោជប៉ុន (Wagyu) ដែលមានលក្ខណៈពិសេសគុណភាពល្អ ថ្មីស្រស់ ទុនផុយងាយស្រួលញុាំ និង មានតម្លៃសមរម្យ។ 

ពេលដែលទៅដល់ហាងភ្លាម ក្រុមការងារយើងបានកុម៉្មង់សុទ្ធតែជាឈុតពិសេសដែលមួយមុខៗណាក៏ទំនងខ្លាំងដែរ ក្នុងនោះមានដូចជា Oyster ស្រស់ ឡាបអាំងថៃ បុកល្ហុងក្តាមប្រៃកាត់ថៃ ត្រីសាល់មុន ស្ងោរជ្រក់ជើងមាន់​ អប់បង្គាថៃ សាច់គោអាំងចង្កាក់ពិសេស និងឈុតសាច់គោអាំងជប៉ុន (Wagyu) ដែលជាទីពេញចិត្តរបស់ប្រិយមិត្តគ្រប់រូបក៏ ដូចជាអ្នកសរសេរនេះផ្ទាល់ផងដែរ។

នៅ Wagyu Gang Yakiniku របៀបញុាំសាច់អាំងឲ្យត្រូវស្តង់ដា ប្រិយមិត្តទាំងអស់គ្នាអាចសាកសាច់អាំងផ្ទាប់ជាមួយសាឡាត់ រុំសារាយ និងបន្ថែមគីមឈីបន្តិច ហើយនៅពេលដែលយើងញុាំជាមួយទឹកជ្រលក់វិញហា៎ គឺកាន់តែលើករសជាតិបន្ថែមទៀតហ្មង! ហើយនៅហាង Wagyu Gang Yakiniku មានទឹកជ្រលក់ដល់ទៅ 3 រសជាតិដូចជា៖ ទឹកជ្រលក់សណ្តែកដីដែលចាប់ជាតិខ្លាំងជាមួយនឹងសាច់ ទឹកជ្រលក់បែបជប៉ុន មានរសជាតិស្រាល ឈ្ងុយហើយជូរតិចៗ និង ទឹកជ្រលក់បែបថៃ រសជាតិដិត ជូរហិល ជារសជាតិដែលក្រុមការងារយើងចូលចិត្តជាងគេ កាន់តែញុាំគឺកាន់តែជក់មាត់។

ហើយបើសិនទៅជាលក្ខណៈគ្រួសារ ឬ ជុំមិត្តភក្តិច្រើនញុាំអត់គ្រប់អីហា៎ ប្រិយមិត្តទាំងអស់គ្នាអាចកុម្ម៉ង់សាច់ថែមបាន ដោយតម្លៃចាប់ពី $3 ឡើងទៅប៉ុណ្ណោះ ជាមួយនឹងគុណភាពសាច់ថ្មីស្រស់ៗ ជិតជាចំណិតភ្លាមៗហ្មង!

ក្រុមការងារ FoodBuzz ចង់ប្រាប់ថា នៅនេះមិនមែនត្រឹមតែជាហាងសាច់អាំងធម្មតាទេណា៎ ប៉ុន្តែក៏អាចជាកន្លែងកាត់សេដផងដែរ។ អញ្ចឹង សម្រេចថាណាត់គ្នាល្ងាចហ្នឹងហើយណា៎ ដើម្បីមកសាកកន្លែងថ្មី ញុាំសាច់អាំង និងចែករំលែករឿងក្នុងចិត្តទាំងអស់គ្នា!