មិនចាំបាច់មានគ្រឿងផ្សំច្រើននិងចំណាយពេលយូរក៏អាចធ្វើបង្អែមដ៏ឆ្ងាញ់ញ៉ាំបាន។ បង្អែមបបរសណ្តែកខៀវគឺងាយស្រួលធ្វើមែនទែន ហើយជាពិសេសបង្អែមនេះអាចញ៉ាំក្តៅៗក៏បាន ដាក់ទឹកកកក៏បាន!

#គ្រឿងផ្សំ៖

• សណ្តែកខៀវ ២២០ក្រាម (លាងទឹកឱ្យស្អាត និង ត្រាំទុករយៈពេល ២ម៉ោងយ៉ាងតិច)
• ស្ករស ១៣៥ក្រាម
• ទឹក ១.៥លីត្រ
• ស្លឹកតយ ២សន្លឹក 
• សាគូ ៤០ក្រាម (លាង និង ត្រាំទឹករយៈពេល១០នាទី)
• ខ្ទិះដូង ២៤០មល

#របៀបធ្វើ៖

១.ដាក់សណ្តែកខៀវ ស្ករ ទឹក និង ស្លឹកតយចូលទៅក្នុងឆ្នាំង រួចបើកភ្លើងឱ្យក្តៅ។ បន្ទាប់មកបន្ថយភ្លើងនៅពេលដែលពុះ រួចឧស្សាហ៍កូរ និង ទុកប្រហែលរយៈពេល៣០នាទី ឬ រហូតដល់ពេលសណ្តែកផុយ។

២.បន្ទាប់មកដាក់សាគូ និង ខ្ទិះដូងចូលរួចទុករយៈពេល ៨នាទី។ ប្រសិនបើខាប់ពេកអ្នកទាំងអស់គ្នាអាចថែមទឹកបាន។

៣.ជាចុងក្រោយ នៅពេលដែលបបរសណ្តែកឆ្អិន អាចញ៉ាំក្តៅៗ ឬ ដាក់ទឹកកកពីលើ​ក៏បាន៕