បុណ្យអុំទូកកន្លងផុតទៅ សល់អំបុកច្រើនមែនទេ? មកច្នៃធ្វើបង្អែមអំបុកចំហុយខ្ទិះដូងបានណា!
ពិធីបុណ្យអុំទូកបានប្រព្រឹត្តនិងកន្លងផុតទៅក៏ពិតមែន ប៉ុន្តែអំបុកដែលបានដាក់ថ្វាយដល់ទេវតានៅសល់ច្រើនពេក ហើយទ្រលាន់លែងចង់ញ៉ាំមែនទេ? អស់បារម្ហ! ថ្ងៃនេះចាំ FoodBuzz យើងមកប្រាប់ពីរបៀបច្នៃធ្វើបង្អែមមួយមុខគឺ អំបុកចំហុយខ្ទិះដូង ដែលធ្វើមកពីអំបុក មានរសជាតិឆ្ងាញ់ប្លែក ធានាញ៉ាំហើយចង់ញ៉ាំទៀតតែម្ដង!
គ្រឿងផ្សំ
១. អំបុក (២ កំប៉ុង)
២. សាច់ដូងខ្ចី (១៥០ ក្រាម)
៣. ទឹកស្លឹកតយ (២៥០ មីលីលីត្រ)
៤. ទឹកដូង (១៥០ មីលីលីត្រ)
៥. ស្ករ (៩០ ក្រាម) និង (៣០ ក្រាម)
៦. ខ្ទិះដូង (៣៥០ មីលីលីត្រ)
៧. ទឹកម្សៅឆា (៥០-៧៥ មីលីលីត្រ)
៨. អំបិលមួយចិប
វិធីធ្វើ
១. ដាក់អំបុក សាច់ដូងខ្ចី ទឹកស្លឹកតយ ទឹកដូង និងស្ករ (៩០ ក្រាម) ចូលចានមួយហើយច្របល់ឲ្យសព្វចូលគ្នាល្អ
២. ដាក់ទឹកដាំក្នុងឆ្នាំងចំហុយមួយ ហើយដួសល្បាយដែលលាយរួចចូលក្នុងចាន ឬកែវដែលអាចចំហុយបាន
៣. ពេលទឹកពុះ ដាក់ល្បាយចូលចំហុយរយៈពេលពី ១២ ទៅ ១៥ នាទី
៤. ក្នុងអំឡុងពេលចំហុយ ដាំខ្ទិះដូងឲ្យពុះលើភ្លើងហឹមៗ រហូតពុះល្អ
៥. ដាក់ស្ករ (៣០ ក្រាម) ចូល អំបិលមួយចិប និងទឹកម្សៅឆាចូលដើម្បីឲ្យកាន់តែខាប់
៦. ដាំឲ្យពុះ រួចបិតភ្លើង
៧. ពេលបង្អែមត្រូវបានចំហុយហើយ ស្រោចខ្ទិះដូងពីលើ និងរោយល្ងខ្មៅបន្តិចឲ្យកាន់តែមានសម្រស់ ហើយក៏រួចជាការស្រេច!
អាចសាកធ្វើញ៉ាំបានណា! ដឹងតែឆ្ងាញ់ជក់ចិត្តដិតអារម្មណ៍តែម្ដង!