ជិះកាត់ផ្សារសូរិយារាល់ដង មានដែរឆ្ងល់អត់ថាហាងជាប់ហាងហ្វឺហ្នឹងគេលក់អីបានមានមនុស្សច្រើនម្ល៉េះ? 

ហាង «ស៊ុប​ 40» ជាហាងស៊ុបជើងចាស់មួយដែលបានបើកលក់នៅទីនេះជាង 30 ឆ្នាំហើយ! ហាងមួយល្វែងនេះមានការរៀបចំបែបខ្មែរសាមញ្ញៗ មានកន្លែងអង្គុយក្នុងនិងក្រៅ គ្រប់គ្រាន់សម្រាប់ក្រុមតូចនិងធំ ហើយក៏មានកន្លែងចតម៉ូតូនៅខាងមុខដែរ។ 

ម៉ឺនុយគេ 3 ឈុតមានទាំង ឈុតភ្នំភ្លើង ឈុតស៊ុប និង ពិសេសឈុតស៊ុបសាច់អាំង។ ឈុតដែលពួកយើងនោះគឺឈុតស៊ុបសាច់អាំងនេះឯង ដែលមានឆ្នាំងស៊ុបនៅកណ្តាល ហើយកន្លែងអាំងសាច់នៅព័ទ្ធជុំវិញ គឺថាងាយស្រួលដួសផងនិងអាំងផងក្នុងពេលតែមួយ។

ដូចឃើញក្នុងរូបចឹង ឈុតដែលពួកយើងហៅមានសាច់គោ បង្គារ និងពងក្រហមមួយចាន បន្លែស្រស់ៗមួយចាន​ ហើយប្លែកជាងគេនោះគឺគេមានឲ្យពងសមួយចានទុកឲ្យយើងចាក់ចូលស៊ុបទៀត!

សាច់ស្រួយមានក្នុងឆ្នាំងហើយ តែបើចង់ហៅសាច់ ឬបន្លែអីបន្ថែម​ គឺគេលើកមួយថាសពេញឲ្យរើសតាមចិត្តតែម្តង។ អ្នកទាំងអស់គ្នាមានជម្រើសដូចជា សាច់គោស្រួយ ផ្អែម សាច់ភ្លៅ សាច់ជ្រូក សាច់ជ្រូកបីជាន់ មឹក បង្គារ និងក្រលៀនសម្រាប់អាំងអីជាដើម។ សម្រាប់ស៊ុបវិញ គេក៏មានជម្រើសច្រើនដែរ ដូចប្រហិតជាច្រើនប្រភេទ ពោះគោ ខួរគោ គ្រឿងក្នុងផ្សេងៗ មី​ គុយទាវ​ បាយ និងបន្លែចម្រុះទៀតផង។ 

ឈុតស៊ុបមានតម្លៃត្រឹមតែ​ 52,000 រៀល ហើយឈុតភ្នំភ្នើងគឺត្រឹមតែ 39,000 រៀលប៉ុណ្ណោះ  បើនិយាយពីរសជាតិវិញ ទឹកស៊ុបមានតែមួយរសជាតិទេ ហើយរាងសាបបន្តិច 

ចំណែកភេសជ្ជ:វិញ អត់មេ្តចបាន! អ្នកអាចកម៉្មង់ទឹកក្រូច កូកា និងស្រាបៀរអីចឹង។ ទៅជាមួយគ្នាច្រើនកាន់តែចំណេញមិនសូវអស់ច្រើនហើយបានមួយឆ្អែតទៀត។ ទៅ «ស៊ុប​ 40» មិនចេះខ្វះរបស់ញុាំទេ មានតែហៅថែមភ្លេចខ្លូន!

«ស៊ុប​ ៤០»​ មានទីតាំងនៅផ្លូវ 63 ផ្ទះ 40 ជិតផ្សារសូរិយា ហើយបើកពីម៉ោង 2:30 ថ្ងៃត្រង់ដល់ 10:30 យប់។