ក្រុម StreetBuzz ចេញពីធ្វើការក៏នឹកឃើញឃ្លានសាច់អាំង ដល់ជិះបានពាក់កណ្ដាលផ្លូវទៅរកអីញ៉ាំហ្នឹង ក៏មានអារម្មណ៌ថាឈ្ងុយសាច់អាំង។​ ក្រឡែកមើលឆ្វេង មើលស្ដាំឆ្វាច់ ស្រាប់តែឃើញកន្លែងមួយមានឈ្មោះថា “សាច់ក្រក់សាងស្នេហ៌” មើលទៅឃើញមានមនុស្សអង្គុយរៀងអ៊ូអរដែរ ទ្រាំមិនបានក៏ចូលទៅតែម្ដងទៅ។

ចូលទៅភ្លាមមិនបាច់គិតអីច្រើនទេ គឺហៅគ្រប់មុខតែម្ដង កន្លែង “សាច់ក្រក់សាងស្នេហ៌” មានលក់សាច់ក្រក់អាំង សាច់គោអាំង និងថ្លើមអាំង។​ កន្លែងរបស់គាត់នេះបានបើកលក់ជាង ១០ ឆ្នាំហើយ។​ អ្នកណានៅម្ដុំផ្សារគីឡូលេខ ៤ ឬ អ្នកដែលតែងតែជិះកាត់ម្ដុំនោះ គឺសុទ្ធសឹងតែជាម៉ូយរបស់គាត់ទាំងអស់ហើយ សាកសួរទៅ ម្នាក់ៗសុទ្ធតែមានអនុស្សាវរីយ៍នៅកន្លែងគាត់តែទាំងអស់ហ្នឹង​។ 

ហៃឥឡូវ មិនឲ្យមានម៉ូយច្រើនម៉េចកើត បើសាច់អាំងរបស់គាត់មួយមុខណាក៏ឆ្ងាញ់ដែរ ហ៎! 

ម៉ូយៗសរសើរជាងគេគឺសាច់ក្រក់ហ្នឹងឯង និយាយពីថាសាច់ក្រក់មួយដុំណាក៏សាច់ហាប់ណែនល្អដែរ ហើយមិនសូវមានខ្លាញ់ទៀត ពេលញ៉ាំទៅឈ្ងុយក្លិនសាច់គោសុទ្ធៗ មិនត្រឹមតែប៉ុណ្ណោះទេពេលញ៉ាំទឹកកកក្រោយពីបានញ៉ាំសាច់ក្រក់នោះ ធ្វើឲ្យភ្ញៀវចាប់អារម្មណ៌ថាគ្មានជាតិខ្លាញ់កកជាប់នឹងក្រឡើត ឬបំពង់កអីទេ ខុសពីសាច់ក្រក់រាល់ដង។ 

មិនមែនតែសាច់ក្រក់ទេ សូម្បីតែសាច់គោ និងថ្លើមអាំងវិញក៏ធ្វើចេញមកក៏រៀងប្លែកខុសគេដែរ។ សាច់ និង​ ថ្លើមនៅកន្លែងរបស់គាត់ បានយកប្រឡាក់ឲ្យចូលជាតិហើយទើបយកមកអាំង។ ហើយពេលអាំងហ្នឹង គាត់បានយកសាច់ទាំងអស់នោះមកជ្រលក់ក្នុងទឹកគ្រឿងរបស់គាត់នោះបន្ថែមទៀត ដើម្បីឲ្យវាចូលជាតិ។ ជ្រលក់ច្រើនដងចឹងហើយ ទើបសាច់ និងថ្លើមអាំងនោះមានជាតិឡើងអ៊ែមតែម្ដង ញ៉ាំទៅដឹងថាសាច់នោះប្រឡាក់ស្រស់ៗ ឯរសជាតិវិញក៏ដឹងថាប្រើរូបមន្ដសុទ្ធៗដែរ គឺឈ្ងុយហើយឌិតជាប់មាត់ជាប់ច្រមុះ ទោះបីមិនដាក់លាយជាមួយរទឹកជ្រលក់ ឬជ្រក់អីក៏ញ៉ាំទៅឆ្ងាញ់ដែរ។

ឆ្ងាញ់ៗ ចឹងតិចច្រឡំថាទៅទិញនៅកន្លែងផ្សេងចុះ មិនមែនទេណា។ ទាំងសាច់ក្រក់ សាច់គោ ថ្លើម និងគ្រឿងប្រឡាក់អីគឺសុទ្ធតែធ្វើខ្លួនឯងទាំងអស់ ហើយតម្លៃវិញរឹតតែសមរម្យទៀតមួយចង្កាក់តែ ៣០០០៛ ទេ។ 

មិនត្រឹមតែសាច់ទេដែលភ្ញៀវគាត់ចូលចិត្តទេ សូម្បីតែជ្រក់ដែលធ្វើខ្លួនឯងវិញហ៎ា គ្រាន់តែឃើញភ្លាម ឃ្លានភ្លែត ជ្រក់របស់គាត់ស្រស់ៗ ហើយស្រួយទៀត ឆ្ងាញ់ ញ៉ាំជ្រក់ទទេក៏មិនទ្រលាន់ដែរ។

គ្នាយើងណា​ចង់ញ៉ាំសាច់ក្រក់ សាច់គោ ថ្លើមអាំង ជាមួយនំប៉័ងអីមកសាកនៅសាច់ក្រក់សាងស្នេហ៌ ប៉ុន្តែប្រយ័ត្នរឿងមួយបើញ៉ាំកនៅន្លែងហ្នឹងហើយអាចជាប់ស្នេហ៌នៅទីនោះ មិនមែនជាប់ស្នេហ៌ជាមួយអ្នកលក់ ឬ ក្រាស់អីទេណា គឺជាប់ជាមួយហ្នឹងម្ហូបដ៏បំភ្លេចមិនបានរបសើគាត់ហ្នឹងតែម្ដង។ 

ទីតាំង៖ នៅផ្សារគីឡូលេខ៤ #សាច់ក្រកសាងស្នេហ៍, ផ្លូវ 257 កែង132, សង្កាត់ ទឹកល្អក់ 2, ខ័ណ្ឌ ទួលគោក ក្រុង ភ្នំពេញ, 12157

សាច់ក្រក់សាងស្នេហ៌

ព័ត៌មាន៖ ហ្វេសប៊ុក Facebook-សាច់ក្រក់សាងស្នេហ៌