ដូចដែលបានដឹងស្រាប់ថាបាញ់ត្រាំងជាគ្រឿងផ្សំមួយមុខដែលយើងអាចយកទៅច្នៃធ្វើជាម្ហូបបានជាច្រើនមុខ និងញ៉ាំបានជាច្រើនរបៀប។ ហើយថ្ងៃនេះ FoodBuzz យើងនឹងចែករម្លែកពីវិធីធ្វើ ញាំបាញ់ត្រាំង ដែលមានរសជាតិប្រៃផ្អែមជូរ​ ហើយហឹរតិចៗ ធានាថាឆ្ងាញ់ជាប់មាត់!

#គ្រឿងផ្សំ

១. ប្រេង

២​. បាញ់ត្រាំង (២០​សន្លឹកកាត់ឲ្យតូចរាងទ្រវែង)

៣. ពងទាស្ងោរហើយ (ស្ងោរ៦​នាទីហើយដាក់ចូលទឹកត្រជាក់ភ្លាមៗ) 

៤. ខ្ទឹមក្រហម​ (១០​មើមហាន់ជាចំណិតស្ដើងៗ)

៥. សណ្ដែកដី (១២០ក្រាម)

៦. ទឹកសុីអុីវចិន (៣ស្លាបព្រាបាយ)

៧. ទឹកខ្មេះផ្លែប៉ោម (៣ស្លាបព្រាបាយ)

៨. ស្ករស (២ស្លាបព្រាបាយ)

៩. ម្សៅម្ទេសកូរ៉េ (១ស្លាបព្រាបាយ)

១០. ម្ទេសឆា (​១ស្លាបព្រាបាយ)

១១. ស្វាយខ្ចី (កន្លះផ្លែ សាប់ឲ្យក្លាយជាសសៃតូចៗ)

១២. បង្គាក្រៀម​ (៥០ក្រាម)

១៣. សាច់គោងៀត (៥០ ក្រាម)

១៤. ជីរណា

១៥. ស្លឹកខ្ទឹម

១៦. ជីអង្កាម

#វិធីធ្វើ

១. ដាក់ប្រេងក្នុងខ្ទះឲ្យក្ដៅ ហើយចាក់ខ្ទឹមក្រហមចូល រួចបំពងឲ្យឡើងពណ៌ជើងអង្រ្កង រួចទុកមួយឡែក

២. បន្ទាប់មកបំពងសណ្ដែកដីឲ្យឈ្ងុយ

៣. លាយទឹកជ្រលក់សម្រាប់ញាំដោយលាយ ទឹកសុីអុីវចិន ទឹកខ្មេះ ស្ករស ម្សៅម្ទេសកូរ៉េ (ឬម្ទេសម៉ដ្ត) ម្ទេសឆា ចូលគ្នាឲ្យសព្វល្អ

៤. យកចានគោមធំំមួយហើយដាក់បាញ់ត្រាំង ខ្ទឹមក្រហម​ សណ្ដែកដី ស្វាយខ្ចី បង្គាក្រៀម​ សាច់គោងៀត ជីរណា ស្លឹកខ្ទឹម និងប្រេងចូល

៥. ចាក់ទឹកសម្រាប់ញាំដែលលាយហើយចូល ហើយលាយវាចូលគ្នាទាំងអស់ឲ្យសព្វល្អ

៦. ចាប់ដាក់ចានហើយកាត់ពងទាដែលស្ងោរហើយពីលើ រួចរោយជីអង្កាមពីលើ ជាការស្រេច!

ញាំបាញ់ត្រាំង​ នេះយើងអាចធ្វើញ៉ាំបានសឹងតែគ្រប់ពេលតែម្ដង! ជុំគ្នាជាមួយមិត្តភក្តិក៏បាន ជុំគ្នាជាមួយគ្រួសារក៏បាន ញ៉ាំម្នាក់ឯងលេងៗក៏បាន។​ ចំណាយអស់តិចហើយ​ ញ៉ាំបានច្រើនគ្នាទៀត!