តោះប្រជុំហៅជើងដើរលេងទាំងអស់មកឲ្យស្គាល់ កាហ្វេ «ភូមិចាស់» នៅខេត្តកំពត! កន្លែងនេះបែបដូច  រីសតធម្មជាតិៗ កាហ្វេនិងអាហារដ្ឋានទៀតផង ទៅរកនៅឯណាបានទៀត! បរិយាកាសនៅភូមិចាស់​មានលក្ខណ:ធំទូលាយខ្លាំង ស្ងប់ស្ងាត់ មានរុក្ខជាតិស្រស់បំព្រង ហើយ ការតុបតែងហាងមានរចនាបទដូចនៅតាមស្រុកស្រែផ្ទះអ្នកភូមិពិតៗអញ្ជឹង! មិនត្រឹមតែមានកន្លែងអង្គុយក្នុងបែប cozy ប៉ុណ្ណោះទេ  កន្លែងអង្គុយក្រៅក៏មានច្រើននៅក្នុងសួនក្រោមដើមឈើម្លប់ៗត្រជាក់ៗ ហើយមានប្លង់ទេសភាពថតរូបឡូយៗណាស់! 

 «ភូមិចាស់»​​ ជាហាងកាហ្វេលក់ភេសជ្ជ:ពេញនិយម មានជម្រើសច្រើនតាមចំណង់ចំណូលចិត្តមិនថាកាហ្វេ តែ ឬសូដា។ និយាយមែន បើបានផឹកបណ្តើរ សម្រាកមើលទេសភាពនៅទីនោះបណ្តើរ មិនដឹងថាល្អយ៉ាងណាទេ!

 ថែមពីនេះ «ភូមិចាស់» ក៏ជាភោជនីយដ្ឋានលក់ម្ហូបខ្មែរដូចបុកល្ហុក សាច់ជ្រូក សាច់មាន់អាំងចង្កាក់ បាយស្រូប បាយមាន់ នំបញ្ជុក នំគ្រក បាញ់ឆែវ និងនំប័ុងសាច់ផ្សេងៗទៀតផង! សូម្បីតែរបៀបតុបតែងម្ហូបក៏មានលក្ខណ:ខ្មែរៗគួរឲ្យចង់ភ្លក់ផងដែរ។ ហាងមានទទួលកុម្ម៉ង់អាហារទាំងព្រឹក ទាំងថ្ងៃ និងល្ងាច។ 

ក្រៅពីមានម្ហូប និងភេសជ្ជ: «ភូមិចាស់» ផ្តល់កន្លែងស្នាក់នៅតុបតែងជាតង់ធំៗ មានទាំងអង្រឹងសម្រាប់សម្រាកលេងរុំព័ទ្ធដោយធម្មជាតិដើមឈើបិទជិតស្ងប់ស្ងាត់ណាស់!

ជាងនេះទៅទៀត ហាងក៏មានកន្លែងធំទូលាយសម្រាប់បោះតង់ កន្លែងអង្គុយញុាំបាយ ហើយជំរុំភ្លើង។ ទោះមកជាមួយគ្រួសារ ឬមិត្តភក្តិ ដឹងតែសប្បាយជួបជុំគ្នាហើយ ជាពិសេសនៅពេលយប់​ដែលមានភ្លើងតុបតែង មើលមេឃ មើលផ្កាយ មានអារម្មណ៍សប្បាយផង អន្លង់អន្លោចផង! 

 បើចង់ដើរលេង បំបាត់ការស្មុគស្មាញ តប់ប្រមល់ ឬចង់នាំគ្រួសារ កូនៗមកលេងកំសាន្តបែបធម្មជាតិ «ភូមិចាស់» គឺជាកន្លែងល្អសម្រាប់អ្នកដោយមានទីតាំងត្រឹមតែ 15 នាទីពីខេត្តកំពតតែប៉ុណ្ណោះ!