FoodBuzz បានចេញអត្ថបទពី អាហារកូរ៉េទំនងៗដែលអ្នកបានឃើញនៅក្នុងរឿងភាគកូរ៉េ ហើយតែងប្រាថ្នាចង់ញ៉ាំ កាលពីប៉ុន្មានអាទិត្យមុននេះ ហើយយើងក៏បានលើក Myun Ryu Kwan មកនិយាយខ្លះៗដែរ តែមិនសូវជាស៊ីជម្រៅប៉ុន្មានទេ។ តែលើកនេះ យើងនឹងធ្វើការសរសេរបន្ថែមអំពី ហាងដ៏គួរឲ្យចាប់អារម្មណ៍នេះតែម្តង ថាតើអ្នកនឹងអាចភ្លក្សរសជាតិអាហារបែបណាខ្លះនៅទីនេះ?

បើមើលពីខាងក្រៅ ហាក់ដូចជាមិនទំនងចូលតែម្តង ប៉ុន្តែពេលដែលស្គាល់ម្តងហើយ ច្បាស់ជានឹកឃើញចង់មកទៀតតែម្តង។ ហាងកូរ៉េ ម្ញន់ន្យូក្វាន់ (면류관 / Myun Ryu Kwan) លោកអ្នកអាចញុំានូវម្ហូបកូរ៉េចម្រុះមុខ ជាមួយនឹងរសជាតិដើមពិតៗពីកូរ៉េ ដោយសារតែម្ចាស់ហាងជាចុងភៅជនជាតិកូរ៉េផ្ទាល់។

នៅទីនេះ លោកអ្នកអាចកុម្ម៉ងញ៉ាំបាននូវមុខម្ហូបជាច្រើនមុខដូចជា៖ Jjajangmyeon, Kimchi Jigae, Jjampong, Galbi, Mandu Dumplings, Kongguksu, Sweet sour pork និងមុខម្ហូបជាច្រើនមុខទៀត។ ក្រៅពីនេះទៅទៀត អាហារបន្ទាប់បន្សំជាច្រើនមុខទៀតនឹងផ្តល់ជូនដោយឥតគិតថ្លៃនៅពេលញុំា ដែលក្នុងនោះរួមមាន បបរសារាយដែលមានរសជាតិឆ្ងាញ់ពិសេស ទឹកសម្រាប់ញុំាដោយសេរី និង ទឹកក្រូចឆ្មារ ជាមួយនឹងផ្លែឈើសម្រាប់លាងមាត់។

សេវាកម្មរហ័ស និង រួសរាយរាក់ទាក់ អាហារមានរសជាតិឆ្ងាញ់ សាកសមសម្រាប់អាហារថ្ងៃត្រង់ រឺពេលល្ងាចជាមួយមិត្តភក្តិ ជាពិសេសបរិយាកាសក្នុងហាងមានចាក់បទកូរ៉េល្បីៗកំដរអារម្មណ៍អ្នកញ៉ាំទៀតផង។

 

ប្រភេទតម្លៃ៖ ចាប់ពី $4.00 ឡើងទៅ

ទីតាំង៖ ផ្ទះលេខ 91A ផ្លូវលេខ 173&416 (ផ្លូវខាងក្រោយស្ថានទូតចិន)