បើនិយាយពីចំនួនភោជនីយដ្ឋានកូរ៉េនៅភ្នំពេញយើងវិញគឺវាច្រើនគួរឱ្យភ្ញាក់ផ្អើលគួរសមដែរ ប៉ុន្តែសម្រាប់ foodie (អ្នកចូលចិត្តញ៉ាំ និងស្វែងរកអាហារថ្មីៗ) គ្នាយើងគ្មានអ្វីដែលគេហៅថា “ច្រើនពេក” ទេមែនអត់? ថ្ងៃនេះ FoodBuzz នឹងនាំយកនូវដំណឹងល្អមួយសម្រាប់អ្នកទាំងអស់គ្នា ពីវត្តមានភោជនីយដ្ឋានកូរ៉េថ្មីមួយដែលទើបនឹងបើកដំណើរការថ្មីៗនេះ ដែលមានទីតាំងស្ថិតនៅម្ដុំទួលគោកយើងនេះតែម្តង។

លាក់ខ្លួននៅក្នុងប្លុកតូចមួយនៃតំបន់ទួលគោក អ្នកនឹងឃើញមានភោជនីយដ្ឋានកូរ៉េមួយឈ្មោះថា Mashisoyo Cambodia ដែលមានកញ្ចក់ថ្លាឆ្លុះឃើញខាងក្នុងតែម្តង មើលទៅធម្មតាៗតែចូលទៅមានអារម្មណ៌បែបលក្ខណៈកូរ៉េៗតែម្ដង។ បើប្រៀបធៀបទៅនឹងភោជនីយដ្ឋានកូរ៉េផ្សេងទៀត Mashisoyo មានទំហំតូចជាងគេមែន តែភោជនីយដ្ឋាននេះមានចំណុចពិសេសផ្ទាល់ដែលអាចឆក់យកបេះដូងអតិថិជនតាមរយៈរសជាតិដែលយកឈ្នះក្រពះអ្នកនេះតែម្តង។

Mashisoyo មានន័យថាឆ្ងាញ់ជាភាសាកូរ៉េ ហើយភោជនីយដ្ឋាននេះដាក់ឈ្មោះពិតជាត្រូវនឹងឈ្មោះដោយសារម្ហូបមួយមុខៗសុទ្ធសឹងតែមានរសជាតិឈ្ងុយឆ្ងាញ់។ Mashisoyo មានផ្តល់ជូននូវជម្រើសមុខម្ហូបអាហារជាច្រើនប្រភេទដូចជា Budae Jjigae Ramen, Tteokbokki, ពងទាចំហុយ, គាវបំពង, Kimbap, និង Corn Dog ជាដើម។ បើចង់ញ៉ាំអាហារកូរ៉េបែបសាមញ្ញៗ ទៅ Mashisoyo គឺអត់ខុសទេ!

ម្ហូបដែលយើងភ្លក្សមុនគេនោះគឺ Meatball Skewer និង Classic Tteokbokki ដែលនិយាយទៅគឺឆ្ងាញ់តែម្ដង ទំពាមករៀងស្វិតៗ ផ្អែមហើយហឹរតិចៗ។ សម្រាប់ Kimchi Jjigae Ramen របស់យើងគឺថាមួយចានពេញប៉ឹបតែម្ដង ព្រោះមានគ្រឿងផ្សំជាច្រើនមុខក្នុងមីមួយចាននេះដែលស័ក្ដិសមបំផុតសម្រាប់ញ៉ាំគ្នា 2-3 នាក់។ Kimchi Jjigae Ramen មានស៊ុបគីមឈី, មី, សាច់ក្រក, សាច់ Spam, តៅហ៊ូ, rice cake, និងបន្លែប៉ុន្មានមុខទៀតនៅផ្នែកកណ្តាលខ្ទះ ហើយជុំវិញព័ទ្ធទៅដោយឈីស, ពោត, ស៊ុត និងគីមឈី។ គ្រាន់តែស៊ុបពុះភ្លាម គឺភាយក្លិនឈ្ងុយៗពីខ្ទះមកតែម្ដង ទំនងខ្លាំងមែនទែន។

ចំណែកឯភេសជ្ជៈវិញ យើងមាន Strawberry Fizz និង Passion Fruit Fizz ត្រជាក់ៗនិងស្រស់ស្រាយខ្លាំងតែម្ដង។ អាហារមួយពេលនៅ Mashisoyo នេះគឺបរិបូរណាស់ ឆ្អែតហើយឆ្ងាញ់ប្លែកមាត់ទៀត!

Tip: បើអ្នកទាំងអស់គ្នាទៅពេលល្ចាច ទាក់ទងទៅខាងភោជនីយដ្ឋានមុននឹងទៅណា៎ ព្រោះអាចនឹងអស់មិនមានអ្វីញ៉ាំ!

តម្លៃ៖ $1.7 - $17.9