ញ៉ាំម្ហូបអ្នកស្រុកតាមបណ្ដោយទន្លេមេគង្គនៅ La’Baab
ភោជនីយដ្ឋានម្ហូបបែបខ្មែរមានច្រើនគួរសមដែរ ប៉ុន្តែតើមានកន្លែងណាដែលមានម្ហូបឆ្ងាញ់ រសជាតិខ្មែរចំៗ ហើយមានការតុបតែងហាងបែបខ្មែរបុរាណពិតៗទៀតនោះ? បើអ្នកកំពុងរកតែស្វែងរកភោជនីយដ្ឋានបែបនេះ កុំរលងទៅភ្លក្សម្ហូបខ្មែរនៅ La’Baab ឲ្យសោះ!
La’Baab ឬ បើអានជាខេមរភាសាថា ”ល្បាប់“ គឺជាភោជនីយដ្ឋានបម្រើម្ហូបតាមបណ្ដោយទន្លេមេគង្គ ដែលទើបតែបើកដំនើរការពីពេលថ្មីៗនេះ។ ភោជនីយដ្ឋាន La’Baab មានបំរើជាម្ហូបខ្មែរ និង រៀតណាមជាច្រើនមុខ ចំអិនថ្មីៗដោយចុងភៅយ៉ាងចំណាន ដែលរួមមានដូចជា ខ្យងចំហុយសាច់ជ្រូកចិញ្រុំលាយគល់ស្លឹកគ្រៃ ប្រហុកខ្ទិះ ការីខៀវគ្រឿងសមុទ្រ កួងបង្គារ ណែមណឿង ជាដើមដែលសុទ្ធតែឆ្ងាញ់ៗនិងគួរឲ្យចង់ថតបង្ហោះតាមបណ្ដាញសង្គមអួតមិត្តភក្ដិតែម្ដង។
បើនិយាយពីការតុបតែងហាងវិញគឺធានាថាប្លែកភ្នែក មិនដូចអ្វីដែលអ្នកមិនដែលប្រទះពីមុនឡើយ។ ពេលដែលអ្នកឈានចូលLa’Baab អ្នកនឹងមានអារម្មណ៍ហាក់ដូចជាអ្នកបានហោះទៅកាន់អតីតកាល ទៅសម័យបុរាណ ត្រលប់ទៅរស់នៅក្នុងផ្ទះឈើវិញអញ្ចឹង។
ក្រៅពីតុបតែងបែបខ្មែរពិត និង លំអដោយក្រមារ រូបថត ឧបករណ៍នេសាទខ្មែរនៅបិរវេណខាងក្នុងហាងនេះហើយ ទេសភាពពេលដែលអ្នកក្រលេកមើលចេញទៅក្រៅបង្អួចក៏ស្អាតម្យ៉ាងដែរ ព្រោះថាហាង La’Baab នេះគឺនៅជាន់ទីពីរ ដូច្នេះអ្នកអាចទស្សនានិងថតរូបចរាចរណ៍យ៉ាងមមាញឹក និង ទេសភាពអគារខ្ពស់ៗដូចជា Vattanac Tower និង Canadia Tower ដែលនៅជិតនោះបានទៀតផង។
តែប៉ុណ្ណេះអ្នករៀននៅ CamEd សិស្សពេទ្យ UHS ឬអ្នកធ្វើការនៅ Vattanac Tower និង Canadia Tower អីលែងពិបាករកកន្លែងញ៉ាំបាយពេលថ្ងៃត្រង់ហើយ!
ទីតាំង៖ ជាន់ទី2 ខាងលើ Pharmacie De La Gare ផ្លូវព្រះមុនីវង្ស ខណ្ឌដូនពេញ
ម៉ោង៖ 11ព្រឹក ដល់ម៉ោង 10យប់
តម្លៃ៖ ចាប់ពី3.80$ឡើងទៅ