រដូវកាលចូលឆ្នាំទាំងមូល ក្រៅការជះទឹក រាំបទប្រពៃណី លេងល្បែងកម្សាន្តនឹងហើយ អ្វីដែលអត់គិតដល់មិនបាន គឺអាកាសធាតុក្តៅដែលមកជាមួយគ្នានឹងតាហ្មង។ តែនិយាយលេងសើចអី បើបានអង្គុយនៅមាត់ទឹក មានខ្យល់បក់រំហើយៗ នៅអគារបែបបារាំង មាននំឆ្ងាញ់ៗ និងជាពិសេសបានញ៉ាំការ៉េមរសជាតិប្លែកៗពេលថ្ងៃក្តៅនេះទៀត មិនដឹងអេមយ៉ាងណា!

ថ្ងៃនេះចង់ណែនាំឲ្យស្គាល់ហាងមួយ ដែលជនបរទេសនិយមទៅញ៉ាំនៅកំពតគឺ Kampot Pie and Ice Cream Place។ ហាងនេះ ទីតាំងស្រួលរកណាស់ នៅតាមបណ្តោយព្រែកទឹកឈូ ជួរមាត់ទន្លេ គ្រាន់តែជិះកាត់ នឹងក្រឡេកឃើញតែម្តង។ ទីធ្លាហាងតុបតែងតាមបែបសាមញ្ញៗ បើកបម្រើសេវាកម្មតាំងពីព្រឹកដល់យប់ អញ្ចឹងទៅដល់ពេលណាក៏អាចចូលញ៉ាំបានដែរ។

ចំពោះមុខម្ហូបវិញ មានច្រើនប្រភេទឲ្យរើសណាស់ មិនថាម្ហូបខ្មែរ ម្ហូបអ៊ឺរ៉ុប កាហ្វេ នំបុ័ង នំខេក បង្អែម និងការ៉េម ដែលធ្វើស្រស់ៗ លក្ខណៈធ្វើដោយផ្ទាល់ដៃភ្លាមៗជារៀងរាល់ថ្ងៃក្នុងតម្លៃសមរម្យចាប់ពី 3000 រៀលប៉ុណ្ណោះ។

មកលម្អិតពីការ៉េមដែលប្រាប់នៅខាងលើបន្តិច ជាប្រភេទការ៉េមធ្វើផ្ទាល់ដៃ មានច្រើនរសជាតិ ហើយរសជាតិដែលពួកយើងចង់ឲ្យសាកជាងគេ គឺការ៉េមរសជាតិម្រេចកំពត។ គ្រាន់តែឈ្មោះ ក៏ប្លែកហើយ មិនដឹងរសជាតិយ៉ាងម៉េចទេ ត្រូវអត់? តែសូមធានាថាញ៉ាំហើយដឹងតែជាប់ចិត្ត និងសូមសរសើរភាពច្នៃប្រឌិតរបស់ហាងតែម្តង។ 

សម្រាប់អ្នកចូលចិត្តនំផ្អែមៗ កុំភ្លេច Bakery នៅទីនេះណា ព្រោះនំ Pie, Cake, Brownie និង Macaron  នៅទីនេះក៏ឆ្ងាញ់មិនធម្មតាដែរ។ បើឲ្យពួកយើងណែនាំ ពេលកម្ម៉ង់នំ Pie កុំភ្លេចកុម្ម៉ង់ការ៉េមថែម 1 scoop ផង ញ៉ាំចូលគ្នាអេមបស់គេយាយ!

អ៊ីចឹងថ្ងៃចូលឆ្នាំខាងមុខ កុំភ្លេចចូលលេង Kampot Pie and Ice Cream Palace ផងណា៎!