កាហ្វីន - Kaffeine
- #33, Street 253, Sangkat Teuk Laak II, Khan Toul Kork, Phnom Penh
- 061 515 388
Kaffeine (កាហ្វីន) ជាហាងកាហ្វេបើកកាលពីឆ្នាំ 2019 នៅម្ដុំវិទ្យាល័យសន្ធរម៉ុក បង្កើតឡើងដោយក្រុមសហគ្រិនវ័យក្មេងដែលចូលចិត្តកាហ្វេខ្លាំង ហើយក៏យល់ចិត្តអ្នកដែលនិយមចូលហាងកាហ្វេស្រាប់។ ប្រ៊េនមួយនេះមានរូបសត្វ Luwak ជាឡូហ្គូ ងាយស្រួលចំណាំនិងទាក់ទាញ ឃើញតែម្ដងប្រាកដជាចាំ! Kaffeine មិនមែនលក់តែកាហ្វេមួយមុខទេ តែក៏មានជាភេសជ្ជៈច្រើនជម្រើសដូចជាតែ ដែលជាប្រភេទភេសជ្ជៈមានជាតិកាហ្វេអ៊ីនដូចកាហ្វេ ពេលញ៉ាំហើយជួយឱ្យស្វាង បាត់ងងុយគេង ចាប់ផ្ដើមថ្ងៃថ្មីនិងមានកម្លាំងបំពេញការងារ។
នៅ Kaffeine ក៏មានតន្ត្រីបែប Jazz យ៉ាងលន្លង់លន្លោចបន្លឺសម្លេងតិចៗ ត្រូវ vibe តែម្ដង! សាកស្រមៃទៅ បានទាំងហិតក្លិនកាហ្វេឈ្ងុយៗ និងអង្គុយសម្រាកនៅពេលទំនេរ ប៉ុណ្ណឹងក៏ក្ដីសុខតិចៗដែរ។ តែបើថារវល់ មានកាងារត្រូវបំពេញ Kaffeine ក៏ជាជម្រើសយ៉ាងស័ក្ដិសម។
តែមូលហេតុចម្បងដែល Foodbuzz ណែនាំឱ្យទៅហាង Kaffeine គឺដោយសារភេសជ្ជៈឆ្ងាញ់និងតម្លៃសមរម្យ ជាពិសេសគឺភេសជ្ជៈ Iced Cube Series បីប្រចាំហាងដែលយកដុំទឹកកកមានរសជាតិមកប្រើជំនួសទឹកកកធម្មតា យ៉ាងគួរឱ្យចាប់អារម្មណ៍ព្រោះមិនដែលឃើញគេយកទឹកកកដែលមានរសជាតិស្រាប់អញ្ចឹងទេ! ពេលបានដាក់ទឹកកកនេះហើយ ទោះបីទុកយូរយ៉ាងណាក៏ភេសជ្ជៈមិនសាបញ៉ាំលែងឆ្ងាញ់ដែរ។ ភេសជ្ជៈនេះធ្វើឡើងយ៉ាងពិសេសសម្រាប់អតិថិជនដែលតែងខ្ចប់កាហ្វេយកទៅរៀនឬធ្វើការរាល់ព្រឹក និងសម្រាប់អ្នកដែលញ៉ាំយឺត បឺតមិនទាន់បានប៉ុន្នានផងក៏រលាយទឹកកកអស់!
រសជាតិដែលមានការនិយមជាងគេគឺប្រភេទ Coffee Iced Cube Latte ផ្សំពីគ្រាប់កាហ្វេកិនថ្មីៗ ឈ្ងុយៗលាយជាមួយទឹកដោះគោបានជាភេសជ្ជៈមានជាតិល្វីងតិចៗនិងផ្អែមត្រជាក់ដល់បេះដូង។ Iced Cube Green វិញជាតែបៃតងលាយម្សៅម៉ាត់ឆាដើម្បីបានជាភេសជ្ជៈដែលមានរសជាតិស្រស់ស្រាយញ៉ាំមិនទ្រលន់ និងមិនផ្អែមខ្លាំង(តែសម្រាប់អ្នកចូលចិត្តផ្អែមក៏អាចថែមស្ករបានដែរ)។ ភេសជ្ជៈចុងក្រោយជាភេសជ្ជៈពិសេសជាងគេ Green Tea Iced Cube Latte ដែលផ្សំពីកាហ្វេឡាតេដាក់ជាមួយទឹកកករសជាតិតែបៃតង បានរសជាតិពីរក្នុងមួយកែវ។ តែរសជាតិនេះតែងផ្លាស់ប្ដូរគ្រប់ម៉ាត់ ព្រោះពេលទឹកកករលាយទៅ វាបញ្ចេញរសជាតិតែបៃតងមកកាន់តែច្រើន ពេលញ៉ាំបណ្ដើរបានភ្លក្សដែលផ្ដូររសជាតិបណ្ដើរ ស្ដាប់ទៅក៏ទំនងណាស់ដែរ!
ពេលមកហាង Kaffeine ប្រាកដជាឃើញមីនុយដែលមានតម្លៃដាក់ជាប្រាក់រៀល។ នេះជាសមក្មភាពតូចតែមានប្រសិទ្ធិភាពក្នុងការលើកតម្កើនរូបិយប័ណ្ណជាតិឱ្យកាន់តែមានការគាំទ្រពីសំណាក់អតិចិជន។ សម្រាប់អ្នកដែលចូលចិត្តយកកាហ្វេតាមខ្លួនក៏កុំភ្លេចដបទឹកខ្ចូតៗ មានរហូតដល់3ពណ៌របស់ Kaffeine រូបរាងស្អាត ងាយស្រួលប្រើនិងងាយដាក់តាមខ្លួន!
ពេលទៅ Kaffeine កុំភ្លេចសាកភេសជ្ជៈ Iced Cube Series ប្រចាំហាង អាងបានស្គាល់រសេជាតិថ្មីប្លែកមាត់។ ពេលបានញ៉ាំហើយកុំភ្លេចប្រាប់ Foodbuzz វិញផងណា!
តម្លៃ៖ 7000៛+
(Iced Cube Series: 9000៛)
By proceeding, you agree to our Terms of Use and confirm you have read our Privacy Policy.