អត់មានអីចម្លែកទេទៅដើរលេងដល់សៀមរាប ដល់ Pub Street អីហើយឃ្លានចង់ញ៉ាំការ៉េមទាំងយប់ម៉ោង 10-11 អីហ្នឹង ព្រោះអីថាពេលដើរលេងអញ្ចឹងរឿងហាមញ៉ាំយប់ ហើយ Diet អីទុកមួយឡែកសិន។ សប្បាយជារឿងបច្ចុប្បន្ន រឿងឡើងគីឡូជារឿងអនាគត អញ្ចឹងហើយញ៉ាំសិន ចាំគិតតាមក្រោយត្រូវអត់?

ឥឡូវតោះចាំ FoodBuzz នាំទៅញ៉ាំការ៉េមនៅហាងមួយនៅក្រោម Pub Street សៀមរាបយើងនេះ ដែលមិនត្រឹមតែមានការ៉េមឆ្ងាញ់ សម្បូររសជាតិប្លែកៗ ទីតាំងកាលីបទេ ហើយបើកតាំងពីព្រឹករហូតដល់ម៉ោង 11:30 នាទីយប់ទៀត រកណាបាន?

Gelato and Coffee Lab ឬក៏ត្រូវគេស្គាល់ថាជា Gelato Lab គឺជាហាងកាហ្វេនិងការ៉េមបែប Gelato របស់អុីតាលីដែលខុសប្លែកពីការ៉េមសាមញ្ញទូទៅដោយ Gelato ស្អិតនិងមានរសជាតិដិតជាងដោយ Gelato ផ្សំពីទឹកដោះគោច្រើនជាងការ៉េម ហើយក៏មានជាតិធាត់តិចជាងដែរ ហើយត្រូវញ៉ាំក្នុងសីតុណ្ហភាពដែលក្ដៅជាងការ៉េមដូច្នេះមាត់និងអណ្តាតរបស់អ្នកមិនសូវស្ពឹកនិងភ្លក្សរសជាតិបានល្អជាង។

អ្វីដែលពិសេសនោះគឺរាល់ Gelato នៅទីនេះគឺត្រូវធ្វើឡើងដោយផ្ចិតផ្ចង់និងចំរាញ់ពីគ្រឿងផ្សំធម្មជាតិនិងគុណភាពខ្ពស់ៗ ហើយបង្កើតចេញជារសជាតិប្លែកជាច្រើនៗ ដូចជារសជាតិ Ciocclato al pape di Kampot ដែលជារសជាតិសូកូឡាខ្មៅលាយជាមួយនឹងម្រេចកំពត រសជាតិ Rum e Uvetta ដែលជាស្រា rum លាយជាមួយនឹងទំពាំងបាយជូរក្រៀម និងរសជាតិជាច្រើនទៀត ហើយក៏មានជាការ៉េមផ្លែឈើស្រស់បែប Sorbet ផងដែរ។

ពួកយើងធ្វើដំនើរទៅដល់ Gelato Lab នេះពេលព្រលប់គួរសមដែរម៉ោងប្រហែល 10 យប់បន្ទាប់ពីដើរលេងនៅ Pub Street ឆ្អែតហើយយើងក៏សំរេចចិត្តចង់ភ្លក្សរសជាតិ Nocciola ដែលមានជាគ្រាប់ Hazelnut របស់អ៊ីតាលីនិងរសជាតិយ៉ាវអួរ Yoghurt ប៉ុន្ដែចៃដន្យអីអស់បាត់! ហើយខាងបុគ្គលិកក៏បានណែនាំឲ្យភ្លក្សរសជាតិ Tiramisu មានជាតិកាហ្វេ និង Stracciatella វិញដែលមានជា chocolate chip សុទ្ធរហូតដល់ទៅ 80%។

ដំបូងរាងស្ទាក់ស្ទើរបន្ដិចដែរ ព្រោះថាអ្នកសរសេរអត្ថបទមិនសូវចូលចិត្តការ៉េមរសជាតិដែលមានទឹកដោះគោ កាហ្វេ ឬសូកូឡាច្រើនទេ ប៉ុន្ដែ Wow! បន្ទាប់ពីដាក់បានមួយម៉ាត់ហើយជាប់ចិត្តតែម្ដង ការ៉េម 2 ដុំតែមួយភ្លែតប៊ិះតែថតរូបមិនទាន់ហើយតាស៎ ទាំងរសជាតិការ៉េមដ៏ស្អិតរមួតនិងមុតប្លែកពីការ៉េមទូទៅ (ភ្លក្សភ្លាមដឹងដល់គ្រឿងផ្សំតែម្ដង) ទាំងបរិយាកាសដ៏ Chill និងការតុបតែងហាងបែប Vintage ទាំងបុគ្គលិកដ៏រួសរាយទៀត គឺថាដិតអារម្មណ៍តែម្ដង ធានាថាឲ្យតែទៅលើកក្រោយ គឺត្រូវតែទៅម្ដងទៀតដើម្បីភ្លក្សរសជាតិផ្សេងៗទៀតឲ្យបាន។

ហើយបើថាជ្រុលទៅដល់ហើយ ក៏កុំភ្លេចថតរូបស្អាតៗទុកដាក់ Story ក្នុង Instagram អីផង! បានរូបស្អាតហើយបាននាំគេឃ្លានការ៉េមទាំងយប់ទៀត!

ទីតាំង៖ Gelato and Coffee Lab ចន្លោះផ្លូវស៊ីវុត្ថានឹងផ្លូវលេខ 11 ភូមិមណ្ឌលមួយ Pub Street ខេត្តសៀមរាប | Googlemap 

បើកពីម៉ោង៖ 9AM - 11:30PM 

តម្លៃ៖ $1.50/scoop, $2.50/2 scoops