ខ្យូតក៏ខ្យូត ឆ្ងាញ់ក៏ឆ្ងាញ់! តោះរៀនធ្វើ នំប៉ាវរូបកាំប្រម៉ា ស្នូលល្ងខ្មៅ
នំនេះសាកសមមែនទែនសម្រាប់ញ៉ាំជាអាហារសម្រន់និងបង្អែមពេលញ៉ាំបាយរួច ព្រោះសាច់នំទន់ឆ្ងាញ់ខ្លាំងហើយមានស្នូលល្ងខ្មៅផ្អែមល្មមទៀត។ នំប៉ាវរូបរាងជាសត្វកាំប្រម៉ា មានស្នូលខ្មៅល្ងនេះមិនស្មុគស្មាញទេក្នុងការធ្វើនិងធានាថាមាននំញ៉ាំឆ្ងាញ់ញ៉ាំហើយអត់ធាត់ទេព្រោះនំមានកាឡូរីតិច ហើយរូបរាងនំចេញមកឡើងគួរឲ្យស្រលាញ់ខាំ្លង!
#គ្រឿងផ្សំសំរាប់ស្នូលល្ងខ្មៅ
- ម្សៅល្ងខ្មៅ ២៥ ក្រាម
- ប៊ឺ១៥ ក្រាម (Unsalted Butter)
- ស្ករស ១០ ក្រាម
#គ្រឿងផ្សំសំរាប់ម្សៅនំប៉ាវ
- ម្សៅនំ ១០០ ក្រាម
- Instant yeast (ឬមេនំប៉ាវ) ១/៤ ស្លាបព្រាបាយ
- ស្ករស ១០ ក្រាម
- ប្រេងឆា ១ ស្លាបព្រាបាយ
- ទឹកដោះគោ ៦០ ក្រាម
- ម្សៅល្ងខ្មៅ ១ ស្លាបព្រាបាយ
- គ្រាប់ល្ងខ្មៅមួយក្តាប់តូចដើម្បីតុបតែងនំ
#របៀបធ្វើ
១. សម្រាប់ស្នូលនំ លាយម្សៅល្ងខ្មៅ ប៊ឺ និងស្ករសចូលគ្នាឲ្យសព្វហើយដាក់វាដោយឡែក។
២. សម្រាប់ធ្វើសាច់នំ លាយគ្រឿងផ្សំម្សៅនំប៉ាវទាំងអស់ចូលគ្នា (លើកលែងតែម្សៅល្ងខ្មៅ) រួចច្របាច់ម្សៅរយៈពេល១នាទីរហូតទាល់តែវាចូលគ្នាល្អ។
៣. ញែកម្សៅនំជាពីរចំណែកស្មើគ្នា ដោយយកពាក់កណ្តាលនៃម្សៅនំលាយជាមួយម្សៅល្ងហើយច្របាច់ចូលគ្នាឲ្យសព្វ បន្ទាប់មករុំវាជាមួយនឹងប្លាស្ទិចទុកដោយឡែកសិន។
៤. កាត់ម្សៅនំពណ៌សជា៥ ចំណែកស្មើគ្នា ហើយធ្វើវាឲ្យចេញជារាងមូល។
៥. កាត់ម្សៅនំល្ងនោះជា ៥ ចំណែកស្មើគ្នា ហើយធ្វើវាឲ្យចេញជារាងមូលដូចគ្នា។
៦. ធ្វើឲ្យម្សៅនំពណ៌សទាំង៥ចំណែកឲ្យវាសំប៉ែត រួចដាក់ស្នូលចូល រួចធ្វើវាទៅជារាងត្រីកោណ។
៧. ធ្វើម្សៅនំល្ងទាំង៥ ឲ្យសំបែតដើម្បីគ្របពីលើម្សៅនំពណ៌ស។
៨. លាបទឹកពីលើម្សៅនំពណ៌សហើយយកម្សៅនំល្ងគ្របពីលើខ្លួននំពណ៌សលើកលែងតែក្បាលរបស់ម្សៅនំពណ៌ស។
៩. យកប្រើកន្ត្រៃដើម្បីកាត់ផ្នែកតូចៗនៅផ្នែកខាងក្រោយរបស់នំឲ្យមានជារូបរាងកាំប្រម៉ា ហើយដាក់ទ្រាប់ក្រដាសតូចមួយខាងក្រោមនំទាំងអស់ដើម្បីកុំជាប់សិ្អតក្នុងឆ្នាំងពេលកំពុងចំហុយ។
១០. តុបតែងមុខរបស់នំជាមួយ ល្ង២គ្រាប់ជាភ្នែក។
១១. ដាក់នំទាំងអស់ក្នុងឆ្នាំងចំហុយដោយបាញ់ទឹកតិចៗលើនំហើយទុកនំឲ្យរីកធំជាងមុននៅកន្លែងក្តៅល្មមប្រហែល ៤០ ទៅ ៥០នាទី។
១២. ដាក់ចំហុយនំក្រោមកម្តៅក្តៅល្មម ពេលដែលទឹកពុះបន្ថយភ្លើងហើយចំហុយប្រហែល ១៣នាទីជាការស្រេច។
ប្រភព៖ Cooking in Chinglish
**ដោនឡូតកម្មវិធីទូរសព្ទរបស់ FoodBuzz ឥឡូវនេះ ដើម្បីទទួលបានព័ត៌មានថ្មីៗ អំពីអាហារឆ្ងាញ់ៗ និងកន្លែងញ៉ាំជាច្រើន ដ៏សម្បូរបែប៖ http://onelink.to/foodbuzz