ចង់ញ៉ាំរបស់ឆ្ងាញ់ តែមិនអាចចេញទៅក្រៅញ៉ាំបាន? Foodbuzz យល់អារម្មណ៍អ្នកទាំងអស់គ្នា! ប៉ុន្តែកុំបារម្ភ ពួកយើងនឹងណែនាំវិធីធ្វើម្ហូបមួយមុខមកចែករំលែកទៅកាន់អ្នកទាំងអស់គ្នា។ ទោះអត់សូវចេះធ្វើម្ហូបក៏អាចរៀនធ្វើញ៉ាំបានដែរ ព្រោះមុខម្ហូបមួយនេះមានភាពងាយស្រួលធ្វើមែនទែនហើយមានរសជាតិឆ្ងាញ់ទៀតផង!

នេះគឺជារបៀបធ្វើគាវបំពងស្នូលសាច់ជ្រូក និង បង្គារ៖

#គ្រឿងផ្សំ៖

• សាច់ជ្រូកចិញ្ច្រាំ ២០០ក្រាម
• បង្គារចិញ្ច្រាំ ១០០ក្រាម
• ស្លឹកខ្ទឹមហាន់តូចៗល្មម ២ស្លាបព្រាបាយ
• ទឹកស៊ីអ៊ីវ ២ស្លាបព្រាកាហ្វេ
• អំបិល ១ស្លាបព្រាកាហ្វេ
• ប្រេងល្ង ១​/២ស្លាបព្រាកាហ្វេ
• ម្សៅឆា ១ស្លាបព្រាកាហ្វេ
• ម្រេច ១/៤ ស្លាបព្រាកាហ្វេ
• សំបកគាវ ២០សន្លឹក
• ប្រេងឆា 

• ទឹកម្ទេស ឬ ទឹកសៀង

#របៀបធ្វើ៖

១. ស្នូលគាវ៖ ដាក់សាច់ជ្រូក និងបង្គារ (ចិញ្ច្រាំឲ្យតូចៗ) ស្លឹកខ្ទឹម ទឺកស៊ីអ៊ីវ អំបិល ប្រេងល្ង ម្សៅពោត និង ម្រេចចូលគ្នា រួចច្របល់អោយសព្វ។

២. ខ្ចប់គាវ៖ ដាក់សំបកគាវនៅលើចានរាបស្មើ បន្ទាប់មកដួសស្នូលគាវ១ស្លាបព្រាបកាហ្វេដាក់នៅចំកណ្តាលសំបកគាវ រួចយកទឹកមកលាបនៅជាយសំបកគាវ។ បត់សំបកគាវជារាងត្រីកោណ រួចសង្កត់បិទជុំវិញមាត់គាវ ដើម្បីកុំឱ្យមានខ្យល់ចូល។ បន្ទាប់មក យកកែងត្រីកោណ២មកសង្កត់ចូលគ្នា ហើយធ្វើបែបនេះរហូតដល់គ្រប់ចំនួនដែលអ្នកចង់បាន។

៣. បំពងគាវ៖ ដាក់ប្រេងឆាចូល ១/៣នៃខ្ទះ រួចបើកភ្លើងឱ្យខ្លាំង។ បន្ទាប់ពីខ្ទះក្ដៅ ដាក់គាវចូលរហូតដល់គាវឆ្អិនហើយប្តូរពណ៌ទៅជាពណ៌មាស រួចស្រង់ចេញជាការស្រេច។

៤. ដាក់ជ្រលក់ទឹកម្ទេស ឬ ទឹកសៀងតាមចំណង់ចំណូលចិត្ត៕

ប្រភព៖ marionskitchen