ចូលដល់រដូវសម្បូរផ្លែទុរេនអ៊ីចេះ មានគិតថាបើអត់ហូបទុរេនស្រស់ តើអាចធ្វើអីជាមួយនឹងផ្លែឈើទាំងនេះបាន? ដោយផ្លៃទុរេនជាផ្លែឈើដែលពេញនិយមបំផុតនៅភូមិភាគអាស៊ីអាគ្នេយ៍ ផ្លែឈើដែលមានក្លិនឈ្ងុយដិតមួយនេះត្រូវបានគេយកទៅច្នៃជាអាហារ និងបង្អែមជាច្រើនប្រភេទ។ ចង់ដឹងថា តើអ្នកធ្វើអ្វីជាមួយវាបានខ្លះបានមែនទេ? ម៉ោះ មកអានទាំងអស់គ្នា!

#1 ការ៉េមទុរេន

រដូវ​ផ្លែទុរេន ចំខែក្ដៅល្មម! បើអាចច្នៃជាការ៉េមទុកញ៉ាំពេលនៅផ្ទះ តែមានអារម្មណ៍ថាក្ដៅ ចង់ញ៉ាំអីត្រជាក់ៗអ៊ីចឹង ដឹងតែមួយមុខនេះត្រូវមានចាំបាច់ក្នុងទូរទឹកកកហើយចឹង។ មិនតែប៉ុណ្ណោះ ងាយស្រួលនឹងធ្វើទៀតផង។ តោះ ចាប់ផ្ដើមធ្វើទាំងអស់គ្នា! 

គ្រឿងផ្សំ៖ ផ្លែទុរេន, whipping cream, ទឹកដោះគោ

របៀបធ្វើ៖

-          ក្រឡុកសាច់ទុរេននឹងទឹកដោះគោឲ្យម៉ដ្ឋល្អ

-          វាយក្រឡុក whipping cream រហូតទាល់តែហាប់ណែនល្អ

-          លាយទុរេន និង whipping cream ដែលវាយក្រឡុកហើយចូលគ្នាឲ្យសព្វល្អ 

-          រួចចាក់ចូលប្រអប់ ដាក់ឲ្យកកជាការស្រេច

#2 បាយដំណើបទុរេនសង្ឃា

គ្រឿងផ្សំ៖

-          អំបិល ½ ស្លាបព្រាកាហ្វេ/tsp

-          ខ្ទិះដូង ½ កូនចានចង្កឹះ/cup

-          អង្ករដំណើប 2 កូនចានចង្កឹះ/cup

-          ទឹក 2 ស្លាបព្រាបាយ/tbsp

-          ស្ករស 4 ស្លាបព្រាបាយ/tbsp

-          ទុរេន 200 ក្រាម

របៀបធ្វើ៖

-          ដាំបាយឲ្យឆ្អិន រួចទុកដោយឡែកសិន

-          ចាក់ខ្ទិះដូង ស្ករស អំបិល ទឹក និងទុរេនចូលក្នុងខ្ទះក្ដៅ កូររម្ងាស់រហូតទាល់ឆ្អិនល្អ

-          ដួសបាយដំណើបដាក់ចា​ន ចាក់ទឹកសង្ឃាទុរេនពីលើបាយ រួចថែមខ្ទិះដូងពីលើបន្ដិច

-          អាចបន្ថែមសាច់ទុរេនខាងក្រៅ ដើម្បីបន្ថែមរសជាតិបាយដំណើបសង្ឃារបស់អ្នក

#3 ទឹកកកឈូសទុរេន

គ្រឿងផ្សំ៖

-          ទឹកដោះគោខាប់

-          អំបិល

-          Whipping cream

-          ខ្ទិះដូង

របៀបធ្វើ៖

-          វាយ whipping cream រហូតទាល់តែឡើងហាប់ណែន

-          ចាក់ខ្ទិះដូងបន្ទិច អំបិល និងទឹកដោះគោខាប់ រួចកូរឲ្យសព្វ ដាក់ទូរទឹកកកឲ្យត្រជាក់ ដើម្បីបានជាគ្រីម

-          ឈូសទឹកកក ដាក់សាច់ទុរេនអមជុំវិញទឹកកកឈូស រួចដួសគ្រីមដាក់ពីលើ ជាការស្រេច

#4 Pancake ស្នូលទុរេន

គ្រឿងផ្សំ៖ ផ្លែទុរេន, និងផ្សៅធ្វើ pancake (Pancake Mix)

របៀបធ្វើ៖ 

-          ក្រឡុកសាច់ទុរេនឲ្យម៉ដ្ឋ និងហាប់ណែនល្អ រួចដួសទុកមួយឡែក

-          លាយផ្សៅ Pancake ជាមួយទឹក ឬ ទឹកដោះគោ

-          ចាក់ចូលខ្ទះល្មមមួយនំ ឆ្អិនបន្ដិចដាក់ស្នូលទុរេនដែលក្រឡុកហើយចូលប្រមាណមួយស្លាបព្រា

-          ទុកល្មម pancake ឆ្អិន អាចលើកដាក់ចាន ត្រៀមញ៉ាំ។

#5 French Toast រសជាតិទុរេន

គ្រឿងផ្សំ៖ 

-          ទុរេន 400 ក្រាម

-          ស្ករស 40 ក្រាម

-          ទឹកដោះគោខាប់ 80 មីលីលីត្រ

-          ទឹក ½ កូនចានចង្កឹះ

-          ស៊ុត 2 គ្រាប់

-          ទឹកដោះគោ ½ កូនចានចង្កឹះ

របៀបធ្វើ៖

-          លាយសាច់ទុរេន ជាមួយស្ករស និងទឹកដោះគោខាប់ ឲ្យសព្វល្អ

-          ឆាសាច់ទុរេនដែលលាយហើយជាមួយទឹកក្នុងកម្ដៅតិចល្មម រយះពេល 10 នាទីរហូតដល់ស្ងួតទឹក

-          បំបែកពងមាន់ លាយជាមួយទឹកដោះគោ កូរឲ្យសព្វ

-          កម្ដៅខ្ទះជាមួយប័រ រួចជ្រលក់នំប៉័ងបន្ទះក្នុងពងមាន់លាយហើយ ចៀនលើខ្ទះ

-          ដួសសាច់ទុរេនដែលលាយហើយ ដាក់ពីលើនំប៉័ងបន្ទះចៀន រួចជាការស្រេច