ទិញសាច់ជ្រូកបីជាន់មករាល់ដងធ្លាប់តែស្ងោរទេត្រូវអត់? តស់! ឥឡូវដូររសជាតិម្តង មកសាកមកសាច់ជ្រូកបីជាន់មកបំពងម្តងមើស! ចាំ CookBuzz ប្រាប់ពីរបៀបធ្វើ! សាច់ជ្រូកបំពងទៅឡើងស្រួយស្រឺបម៉ង ហើយបើបានជ្រលក់ជាមួយទឹកត្រីអំពិលទុំជូរអែមៗហឹរលមៗទៀត ធានាថាបាយល្ងាចមួយពេលនេះគឺអ៊ែមម៉ង!

គ្រឿងផ្សំ៖

សាច់ជ្រូកបីជាន់ 1 គីឡូ

ស្លឹកខ្ទឹម 6 ដើម

ជីវ៉ាន់ស៊ុយ 8 មើម

ម្ទេសហ៊ុយ 3 ស្លាបព្រាបាយ​

ម្រេចគ្រាប់ 1 ស្លាបព្រាបាយ​

ខ្ទឹមស 4 កំពិស

ស្ករស 3 ស្លាបព្រាបាយ​

អំបិល 3 ស្លាបព្រាបាយ​

ទឹកខ្មេះ 5 ស្លាបព្រាបាយ​

ទឹកអំពិលទុំ 4 ស្លាបព្រាបាយ​

អង្ករលីងម៉ត់ 5 ស្លាបព្រាបាយ​

ទឹកត្រី 5 ស្លាបព្រាបាយ​

ខ្ទឹមក្រហម 4 មើម

ទឹកក្រូចឆ្មា 3 ស្លាបព្រាបាយ​

វិធីធ្វើ៖

1. ស្ងោរសាច់ជ្រូកបីជាន់ បន្ថែមគល់ខ្ទឹម គល់ជីវ៉ាន់ស៊ុយ ម្ទេសក្រៀម ម្រេសគ្រាប់ ខ្ទឹមស និង អំបិល ស្ងោររយៈពេល 15 នាទី

2. យកស៊មចាក់ពីលើស្បែកជ្រូកដែលស្ងោររួចនោះឲ្យសប់មុននឹងវះស្បែកនោះ រួចលាបទឹកខ្មេះនិងអំបិលពីលើឲ្យសប់ល្អ។ ទុកសាច់ជ្រូកអោយស្ងួតល្អរយៈពេលពី ២ ទៅ ៣ម៉ោងមុននឹងយកទៅបំពងរយៈពេល 15 នាទី។

3. ផ្សំគ្រឿងទឹកជ្រលក់ពិសេសមានដូចជា ទឹកត្រី ទឹកអំពិលទុំ ស្ករស អំបិលបន្តិច ម្ទេសម៉ត់ អង្ករលីង ក្រូចឆ្មា ខ្ទឹមក្រហម និង ជីវ៉ាន់ស៊ុយ កូរឲសព្វល្អជាស្រេច! អាចថែមថយតាមគ្រឿងតាមចំណង់ចំណូលចិត្តបាន។

4. អាចរៀបចំញ៉ាំជាមួយបាយតាមចំណង់ចំណូលចិត្តប៉ុន្តែបើបាន សាលាដស្រួយ ជីវ៉ាន់ស៊ុយ​ ស្លឹកខ្ទឹម​ ការ៉ុតឈូស ឆៃថាសឈូស​ ហើយ នំបញ្ចុក​ អីគឺថាត្រូវម៉ាច់តែម្តង!