អ្នកម្ដុំទួលទំពូង ប្រាកដជាស្គាល់កន្លែងញ៉ាំបបរមាន់ល្បីថាឆ្ងាញ់ជាង 20 ឆ្នាំនេះហើយមែនទេ? ប្រិយ​មិត្តខ្លះវិញប្រហែលញ៉ាំតាំងពីនៅតូចមកផងមើលទៅ។​ បបរសាច់មាន់ គឺជាអាហារសាមញ្ញមួយ​ដែលអាចញ៉ាំបានគ្រប់ពេល ព្រោះវាស្រួលញ៉ាំ មិនពិបាកដល់ក្រពះក្នុងការសម្រួលអាហារ ថែមទាំងក្ដៅៗផ្ដល់កម្ដៅក្នុងខ្លួនទៀតផង ជាពិសេសពេលមិនសូវស្រួលខ្លួនហ្នឹងតែម្ដង ដាក់មួយចានដឹងតែបែកញើសធូរស្រាលបន្ដិច។ វាក៏ជាអាហារដ៏ពេញនិយមសម្រាប់ប្រជាជន​ខ្មែរគ្រប់វ័យផងដែរ។​

ថ្ងៃនេះ FoodBuzz សូមធ្វើការណែនាំកន្លែងពេញនិយមមួយដែលអ្នកអាចញាំបបរមាន់​ហើយធានាថា​​ឆ្ងាញ់​មិន​ដូច​ដែល​បាន​ញាំ​ពី​មុ​នមកនៅក្នុងរាជធានីភ្នំពេញ​យើងនេះ។​ អ្នកមិនទាន់ស្គាល់ត្រៀមៗ! ហាងនេះមាន​ប្រជាប្រិយភាពណាស់​​ ជាពិសេសសម្រាប់​អ្នកដែលរស់នៅម្តុំនោះ។ ហាង​នេះ ​បើកដំណើរការ ហើយជាកន្លែងដែលគេចូលចិត្តទៅញ្ុំាបបរមាន់អស់រយៈពេល 20 ឆ្នាំហើយ។

ទោះ​បី​មិន​មែន​​ជាកន្លែង​ទំនើប ទាន់សម័យអ្វី ប៉ុន្តែ​កន្លែង​នេះ​ត្រូវបានគេស្គាល់​ថាជាកន្លែងពេញនិយម​មួយ។ និយាយពីរសជាតិវិញ គឺធានាថាឆ្ងាញ់ ព្រោះ​ថា​ម្ចាស់​ហាងប្រើ​រូប​មន្ត​ជំនាន់ដើម​ ដើមី្ប​រក្សា​រស​ជាតិ​ឲ្យ​នៅ​តែ​ឆ្ងាញ់។ ដូច្នេះហើយ​ទើប​កន្លែង​នេះ​នៅ​តែ​ទទួល​ការ​គាំ​ទ្រ​ជា​ខ្លាំង​ មិន​ដែល​ស្ងាត់ឡើយ​។ បើមិន​ទៅ​ពី​ថ្ងៃ​ទេ​ ដឹង​តែ​អស់​ហើយ។​ បើសាច់វិញ មួយចានៗសាច់ឡើងពេញៗ អត់បារម្ភថាអត់សាច់ញ៉ាំទេ។

បើសាច់មាន់មិនមែនជាចំណូលចិត្តរបស់ប្រិយ​មិត្ត​អ្នកមានជម្រើសផ្សេង​ជាច្រើនទៀត តែដែល​ល្បីមួយទៀតគឺ បបរត្រី។ ធានាថា ឆ្ងាញ់ដូចគ្នា និង​ប្រើ​រូប​មន្ត​បុរាណដូច​គ្នា​។

មិនត្រឹមតែបបរនោះទេ ប្រិយមិត្ត​ក៏​អា​ចញុំា​ គុយទាវស៊ុប នំបុ័ងខគោ មីឆា បាយឆា សម្រាប់​អាហារពេល​រសៀលបានផងដែរ​។​ ចំណែកឯអាហារពេលព្រឹក​វិញ មាន​ បាយសាច់ជ្រូក និង​ បាយសាច់មាន់ជាដើម។

ក្រៅ​ពី​នោះ​មាន​ទឹក​អំពៅ​កិន​ថ្មី​ៗ​ក្នុង​តម្លៃ​តែ​ 2000 រៀល​ប៉ុណ្ណោះ។​ សម្រាប់​តម្លៃបបរមួយចានវិញ សឹងតែមិនជឿ ព្រោះប្រិយមិត្តមានតែ 4000​ រៀល​​ក្នុងហោប៉ៅក៏​អាច ទៅញ៉ាំបបររសជាតិឆ្ងាញ់នេះបានដែរ។ របស់ឆ្ងាញ់ ហើយតម្លៃសមរម្យ​ទៀត នៅចាំអង្កាលទៀត?

តម្លៃ៖ ចាប់ពី 4000 រៀលឡើងទៅ

បើក៖ 5AM – 10PM រៀងរាល់ថ្ងៃ

ទីតាំង​៖ ខាង​ជើង​ផ្សារ​ទួល​ទំពូង​ (ខាង​មុខ)​ ផ្លូវ​លេខ​ 155 សង្កាត់​ទួល​ទំពូង​ I ខណ្ឌ​ចំការ​មន​ រាជធានីភ្នំពេញ​ | Googlemap