ពេលទៅផឹកអីជុំគ្នា ទៅតែកន្លែងដដែលពេកដូចជាអត់សូវរំភើបត្រូវអត់? ក្រុមការងារ FoodBuzz ក៏គិតបែបហ្នឹងដែរ អ៊ីចឹងបានពួកយើងចង់ណែនាំកន្លែងមួយដែលទើបនឹងបើកថ្មីទេ តែទីតាំងល្អណាស់ ជិះតែប៉ុន្មាននាទីពីរង្វង់មូលវិមានឯករាជ្យទេ!

ហាង After Hours ជាកន្លែងជួបជុំល្ងាចៗតែមានបរិយាកាសស្រឡះល្អជាមួយនឹងដើមរុក្ខជាតិអមលម្អពណ៌​បៃតងត្រជាក់ភ្នែក ស័ក្តិសមបំផុតសម្រាប់អ្នកដែលចេញពីធ្វើការល្ងាចៗហើយចង់ជួបជុំជាមួយមិត្តភក្តិ ក្រេបស្រាបៀរបណ្តើរ និយាយពីរឿងក្នុងចិត្តបណ្តើរ។ 

បើនិយាយពីម្ហូបវិញគឺមានច្រើនមុខស្រួលជ្រើសរើសណាស់ដូចជា  អាហារសម្រន់  ម្ហូបឆា បាយឆា សាលាដ ផាសស្តា និង គ្រឿងភ្លាស្រស់ៗ។ ពួកយើងសាកមួយបែបដល់ទៅ 2-3 មុខ សុទ្ធតែទំនងៗទាំងអស់ហើយតម្លៃវិញគឺធូរថ្លៃចាប់ពី $2.5 ដល់ $5 ទេ! 

 

មានម្ហូបហើយអត់មានជាតិអាកុលម៉េចកើត! នៅ After Hours មានមិនខ្វះទេ ស្រាបៀរ ស្រាក្រឡុក និងភេសជ្ជៈអាកុល មានជាច្រើនប្រភេទតែម្តង តែអ្វីភ្ញៀវប្រចាំជាងគេនោះគឺ Beer Tower ឬ ស្តេននោះឯង! មួយស្តេនដល់ទៅ 3 លីត្រ ជុំគ្នាត្រូវម៉ាច តែបើហៅជាដបវិញ ទិញ 5 ដបគឺទទួលមាន 2 ហ្វ្រឺៗតែម្តង!​ សួរមួយ រាល់ដងស្តេនមួយណា? Hanuman ឬ Hoegaarden?