ភ្លៀងធ្លាក់ញឹកញាប់ មេឃត្រជាក់ៗ គ្មានអ្វីក្តីសុខជាងបានអង្គុយញ៉ាំមីស៊ុបចិនក្តៅៗនោះទេ! FoodBuzz សូមណែនាំហាងមីស៊ុបចិនទាំង ៦ កន្លែង ដែលមានរសជាតិឆ្ងាញ់ និងស័ក្តិសមបំផុតសម្រាប់អាកាសធាតុត្រជាក់ៗបែបនេះ។

1. ហៃឡាវ - Hai Lao

គ្រាន់តែបើកទ្វារចូល ក៏សឹងតែលេបទឹកមាត់បាត់ទៅហើយនៅ ហៃឡាវ ជាហាងលក់ស៊ុបបែបចិនសុទ្ធសាតតែម្តង មានទាំងហតផត និងសាច់អាំង។ តម្លៃសមរម្យ ញ៉ាំបានម៉ាស្រឡាញ់ សាច់វិញដាក់តាមចិត្ត អមជាមួយនឹងជម្រើសទឹកស៊ុប​ ដែលអាចរើសបានម្តងដល់ទៅ ២មុខ។ ស៊ុបដែលពេញនិយមជាងគេនោះគឺ​ ស៊ុបឆុងឈីង ញ៉ាំទៅដឹងតែមានអារម្មណ៍កក់ក្តៅហ្មង។

• ព័ត៌មាន៖​ Facebook-ហៃឡាវ - Hai Lao

2. Happy Lamb Hot Pot Restaurant

សម្រាប់បងប្អូនណាដែលចង់ភ្លក់ស៊ុបក្ដៅៗរសជាតិម៉ុងហ្គោលី Happy Lamb គឺជាកន្លែងដែលស័ក្តិសមបំផុតសម្រាប់បងប្អូន។ ទឹកស៊ុបនៅទីនោះមានរសជាតិដើមពីប្រទេសម៉ុងហ្គោលី ហើយមានច្រើនជម្រើសសម្រាប់ជ្រើសរើសទៀត ឯសាច់ និងបន្លែវិញគឺស្រស់ៗគ្រប់ចានតែម្ដង។​ មិនតែប៉ុណ្ណោះ នៅមានទឹកស៊ុបបែបចិនហឹរៗទៀត រសជាតិឈ្ងុយឆ្ងាញ់ បានញ៉ាំហើយដឹងតែជាប់ចិត្ត មកម្តងហើយ ចង់មកម្តងទៀត។ 

• ព័ត៌មាន៖​ Facebook-Happy Lamb Hot Pot Restaurant

3. Kungfu Kitchen 家常便饭

នៅ កុងហ្វូឃីតឈិន មានម្ហូបជាច្រើនមុខ មិនថាហតផត ឬម្ហូបញ៉ាំក្រៅទេគឺមានទាំងអស់។ ម្ហូបនៅទីនោះគឺពេញនិយមណាស់ចំពោះបងប្អូនយុវយ័យគ្នាយើង ជាពិសេសនោះគឺទឹកស៊ុបហតផតរសជាតិស៊ីវឈ័នហ្នឹងហ្មង រសជាតិហឹរ និងមានក្លិនឈ្ងុយបែបចិនៗ។ ហើយសម្រាប់អ្នកអត់ចេះញ៉ាំហឹរ កុងហ្វូឃីតឈិនក៏មានទឹកស៊ុបរសជាតិសាច់មាន់​ រសជាតិប៉េងប៉ោះ និងរសជាតិផ្សិត​ផងដែរ។​ ទំនេរៗបបួលមិត្តៗទៅដឹងតែជាប់ចិត្ត ជាប់អារម្មណ៍ជាមួយរសជាតិ ដកចិត្តមិនរួច។

• ព័ត៌មាន៖​ Facebook-Kungfu Kitchen 家常便饭

4. Lao Bao Hot Pot

Lao Bao Hot Pot និយមថាជាហាងប៊ូហ្វេស៊ុបចិនមួយកន្លែងដែលមានតម្លៃសមរម្យ មានសាច់ និងបន្លែស្រស់ៗល្អទៀត។ តែកុំច្រឡំថាប៊ូហ្វេទាំងអស់ណា ម្ហូបខ្លះក៏គិតលុយដែរ។ ចំណែកឯរសជាតិនៅទីនោះវិញ អាចនិយាយបានថាជារសជាតិកូនកាត់អាស៊ីចម្រុះ ហើយអ្វីដែលល្បីជាងគេនោះគឺស៊ុបស៊ីឈាន់ហ្នឹងឯង ដាក់ទៅក្តៅទាំងអណ្ដាត ក្តៅទាំងកាយ ល្អបំផុតនារដូវរងារនេះ។

• ព័ត៌មាន៖​ Facebook-Lao Bao Hot Pot

5. Fu Hot Pot

Fu Hot Pot រើសម្ដងបានទឹកស៊ុប២រសជាតិ ហើយអាចកម្មង់មី សាច់ និងបន្លែតាមចំណង់ចំណូលចិត្ត។ ទាំងគ្រឿងផ្សំ បន្លែ និងសាច់ទាំងអស់ នៅទីនោះផ្ដល់ជូនសុទ្ធតែរបស់ស្រស់ៗ។​ មិនតែប៉ុណ្ណឹង ទីនោះគឺសម្បូរការលេងកម្សាន្ដចាប់រង្វាន់បញ្ចុះតម្លៃណាស់!​ តម្លៃធូរថ្លៃ ហើយគុណភាពល្អទៀត។ 

• ព័ត៌មាន៖​ Facebook-Fu Hot Pot

6. Mama Wong's Dumpling & Noodle House

Mama Wong's​ មានផ្ដល់ម្ហូបបែបតៃវ៉ាន់រសជាតិដើមដែលមានការកែច្នៃបន្តិចបន្តួច ដើម្បីតម្រូវចិត្តអតិថិជនតាមបណ្ដាតំបន់ផ្សេងៗគ្នា។ ទោះបីកែច្នៃហើយក៏ដោយ ក៏នៅតែមានរសជាតិដើមរបស់ម្ហូបតៃវ៉ាន់ឆ្ងាញ់ដិតជាប់មាត់ដដែល ម្ហូបនៅទីនោះឆ្ងាញ់គ្រប់មុខមែន ប៉ុន្តែម្ហូបដែលពេញនិយមជាងគេគឺមីស៊ុប និងគាវ ដែលមានរូបមន្ដបន្សល់ទុកជាច្រើនជំនាន់។ ម៉ឺនុយរបស់ពួកគេមានមុខម្ហូបជាច្រើនមុខ និងម្ហូបបែបប្រពៃណីដ៏ឈ្ងុយឆ្ងាញ់។ មួយម៉ាត់ណា ក៏មានអារម្មណ៏ថាពោតពេញដោយក្ដីស្រឡាញ់ដែរ។

• ព័ត៌មាន៖​ Facebook-Mama Wong's Dumpling & Noodle House

រដូវត្រជាក់ចឹង នៅចាំអីទៀតបបួលគ្នាមកញ៉ាំមីស៊ុបហតផតមួយគ្នាមក! ហើយបើបានមនុស្សសំខាន់មកជាមួយទៀត ប្រាកដជាអាចបង្កើនរសជាតិទឹកស៊ុបឲ្យកាន់តែឆ្ងាញ់មួយកម្រិតទៀត។ ឥឡូវស្គាល់កន្លែងទាំង ៦ នេះហើយ ហៅគ្នីគ្នាមកស្រូបយកឱជារសហឹរៗ ក្តៅៗនេះទាំងអស់គ្នាមក!