ពិធីបុណ្យភ្ជុំបិណ្ឌ ជាបុណ្យប្រពៃណីជាតិដែលប្រជាពលរដ្ឋទូទាំងប្រទេសបានឈប់សម្រាក និងជាឱកាសនៃការជួបជុំក្រុមគ្រួសារ ហើយនាំគ្នាធ្វើម្ហូបអាហារយកទៅប្រគេនព្រះសង្ឃដើម្បីឧទ្ទិសកុសលទៅដល់ញាតិកាលទាំងប្រាំពីរសន្ដាននិងបុព្វការីជនរបស់ខ្លួនជាដើម។មុខម្ហូបទាំង៥មុខដែលប្រជាពលរដ្ឋខ្មែរនិយមធ្វើយកទៅប្រគេនព្រះសង្ឃក្នុងឱកាសបុណ្យភ្ជុំបិណ្ឌនេះមានដូចជា:

1. ឆាមីសួរ

ជាមុខម្ហូបដែលប្រជាពលរដ្ឋមួយចំនួនគិតថាមិនអាចខ្វះបាន ព្រោះមុខម្ហូបមួយនេះគេមានជំនឿថាអាចធ្វើឱ្យអ្នកដែលស្លាប់ទៅហើយកើតជាប្រេតអាចហូបបានដោយស្រួលជាងម្ហូបណាទាំងអស់។ ឆាមីសួរជាមុខម្ហូបតែងាយស្រួលធ្វើនិងមិនស្មុគស្មាញហើយគ្រឿងផ្សំមានដូចជា មីសួរ សាច់ជ្រូក បង្គាក្រៀម មឹកក្រៀម ផ្សិតត្រចៀកកណ្ដុរ ស្លឹកខ្ទឹម និងគ្រឿងទេស ។

2. សម្លរការី

ជាមុខម្ហូបដែលនិយមបរិភោគជាមួយនំបញ្ចុក ឬនំប៉័ង។ ការី ជាមុខម្ហូបម្យ៉ាងដែលប្រើបន្លែនិងគ្រឿងទេសច្រើនមុខ និងមានលក្ខណៈសាំញ៉ាំបន្តិចតែរសជាតិនៃសម្លការីមានឱជារសឈ្ងុយឆ្ងាញ់ស័ក្ដិសមនឹងពេលវេលានៃការចម្អិនមុខម្ហូបមួយនេះ។​ សម្លការីមានគ្រឿងផ្សំដូចជា សាច់មាន់ ខ្ទិះដូង ម្ទេសឆ្អើរ ខ្ទឹមសខ្ទឹមក្រហម សណ្ដែកដី គ្រាប់ប៉ូចកាក់ កាពិ ដំឡូងជ្វា ខ្ទឹមបារាំង សណ្ដែកគួរ ក្រូចសើច គ្រឿងបុក ស្ករត្នោត និងគ្រឿងទេស។

3. ខជើងជ្រូក

ជាអាហារដែលងាយស្រួលធ្វើនិងអាចរក្សាទុកបានយូរ។ សម្លមួយប្រភេទនេះមានគ្រឿងផ្សំដូចជា ត្រពាំង ជើងជ្រូក ស្ករត្នោត ម្រេច ខ្ទឹមស អាចបន្ថែមពងទា និងគ្រឿងទេស។

4. ចាប់ឆាយ

ជាប្រភេទអាហារដែលមានគ្រឿងទេសនិងបន្លែច្រើនមុខបញ្ចូលគ្នា ហើយត្រូវការរយៈពេលដើម្បីរំងាស់ឱ្យកាន់តែមានមានរសជាតិ។ ចាប់ឆាយ មានគ្រឿងផ្សំដូចជា ស្ពៃបូកគោ ដើមខាត់ណា ឆៃថាវ ពពុះសណ្ដែក ស្បែកជ្រូក ផ្សិតក្រៀម ជើងជ្រូកឬឆ្អឹងជ្រូក ខ្ទឹមស ប្រេងឆា និងគ្រឿងទេស។

5. នំអន្សម

ជាអាហារដែលនិយមនារដូវការបុណ្យទានឬពិធីពិសេសណាមួយជាដើម ដែលមានប្រវត្តិទាក់ទងទៅនឹងជំនឿសាសនាផង និងមានវត្តមានតាំងពីបុរាណកាលរបស់ខ្មែរផង។ នំអន្សម មានគ្រឿងផ្សំដូចជា អង្ករដំណើប សណ្ដែក សាច់ជ្រូកបីជាន់ឬផ្លែចេក ខ្ទិះដូង ស្លឹកចេក ខ្សែសំរាប់ចង និងគ្រឿងទេស។ 

មុខម្ហូបទាំង ៥នេះហើយដែលនិយមឃើញនៅតាមបណ្ដារវត្តនានា តែក៏មានមុខម្ហូបផ្សេងៗជាច្រើនទៀតដែរ ដែលឆ្លុះបញ្ចាំងឱ្យឃើញពីការចូលរួមយ៉ាងសស្រាក់សស្រាំរបស់ពុទ្ធបរិស័ទ ដែលគោរពព្រះពុទ្ធសាសនា ហើយក៏ជាការដឹងគុណចំពោះបុព្វការីជនដែលបានចែកឋានទៅហើយ។