មានទីតាំងនៅម្ដុំផ្សារទួលទំពូង ហាងកាហ្វេ 11:11 Café​ មានបរិយាកាសដ៏ស្ងប់ស្ងាត់ ស្រស់ស្រាយល្អ​​​​​​​​​​​​​​​​​​​​​​​​​​​​​​​ស័ក្តិសម​សម្រាប់អង្គុយលំហែអារម្មណ៍ពីកង្វល់នានា។ 

ហាងនេះត្រូវបានដាក់ឈ្មោះថា 11:11 ពីព្រោះម្ចាស់ហាងមានបំណងចង់បើកហាងកាហ្វេមួយផ្ទាល់ខ្លួន ប៉ុន្តែមិនមានសមត្ថភាព​​​​​​​​​​​​​​​​​​​​​​​​​​​​​​​​ពីដំបូង​។ បន្ទាប់មកក៏បបួលគ្នីគ្នាពិភាក្សារឿងបើកហាងកាហ្វេ ចៃដន្យអី ឲ្យតែពេលនិយាយគ្នា​ ឧស្សាហ៍ឃើញម៉ោង 11:11 ដែលជាជំនឿប្រផ្នូលមួយតំណាងឲ្យសេចក្ដីសង្ឃឹមលើបំណងប្រាថ្នាឲ្យក្លាយជាការពិត។ ដូច្នេះហើយពួកគាត់ជឿជាក់ថានឹងអាចបើកហាងកាហ្វេក្នុងក្ដីស្រម៉ៃនេះបាន​ ហើយក៏ដាក់ឈ្មោះ 11:11 តែម្ដង!

ហាងកាហ្វេ​ 11:11 Café​ មានទាំងកន្លែងអង្គុយក្នុងនិងក្រៅ រីឯក្រុម FoodBuzz យើងណែនាំឲ្យអង្គុយនៅខាងក្រៅពីព្រោះមានដើមឈើពណ៌បៃតងស្រស់ៗ ផ្គួបជាមួយខ្យល់បក់មកតិចៗ នឹងធ្វើឲ្យអារម្មណ៏ស្រស់ថ្លា ផុតអស់កង្វល់​ខ្វល់ខ្វាយ។ 

ក្រុម FoodBuzz យើងពេញចិត្តនឹងការតុបតែងដ៏ស្រស់ស្អាតនិងទាន់សម័យរបស់ហាងកាហ្វេមួយនេះមែនទែន! សម្បូរប្លង់សម្រាប់ថតរូបស្អាតៗ សូម្បីបន្ទប់ទឹកក៏មានប្លង់ថតម៉ាឆ្ងាញ់ដែរ!

ហាងកាហ្វេ 11:11 Café មានលក់ភេសជ្ចៈជាច្រើន មានគ្រប់រសជាតិ។ ពួកយើងចូលចិត្ត Tiramisu Choco Frappe ជាងគេ ព្រោះវាមិនផ្អែមពេក មានជាតិនិងក្លិនសូកូឡាស្រាលស្រទន់ ល្មមឆ្ងាញ់។ ​​​​​​​​​​​​​​​​​​​​​​​​នៅក្នុងស៊េរី Tiramisu នេះមាន Tiramisu Choco​ និង Tiramisu Espr​esso​ សម្រាប់ជាជម្រើសដល់អតិថិជន។

រីឯក្នុងស៊េរីភេសជ្ជៈ Popcorn (ពោតផ្ទុះ) វិញក៏មានបីភេសជ្ជៈដែរ គឺ Popcorn Frappe, Popcorn Espresso and Popcorn Milk ហើយគ្នីគ្នា FoodBuzz យើងពេញចិត្តនឹង Popcorn Frappe ជាងគេ​ចំណោមបីនោះ តែដោយសារពួកយើងចូលចិត្តសូកូឡា ចឹងហើយបើឲ្យរើស គឺនៅតែជ្រើសយក​ Tiramisu Frappe ដដែល។ 

ងាកមកភេសជ្ជៈប្រចាំហាងវិញ ពួកយើងបានសាកកាហ្វេទឹកដោះគោត្នោត ដែលធ្វើឡើងដោយកាហ្វេ ហើយប្រើប្រាស់ស្ករត្នោត​ជំនួសឲ្យស្ករស​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​។ មួយកែវនេះមានជាតិកាហ្វេខ្លាំង រៀងដិតជាងធម្មតាបន្តិច ដូច្នេះហើយបើអ្នកណាត្រូវការជាតិកាហ្វេអុីនធ្ងន់ ប្រហែលពេញចិត្តជាមួយមួយកែវនេះហើយ។​ 

11:11 Café ក៏មានលក់ទឹកក្រូចស្រស់ ច្របាច់ថ្មីៗ ភ្លាមៗច្រកដាក់ក្នុងដបអម្បែងទៀតផង។ រសជាតិបែបជូរអែមៗ​ រំសាយអារម្មណ៍ឲ្យស្រស់ស្រាយ​។ 

ឲ្យពិន្ទុហាងកាហ្វេបើកថ្មីនេះ ៨/១០ ។ ហើយសម្រាប់ព័ត៌មានបន្ថែម អ្នកទាំងអស់គ្នាអាចតាមដាន Facebook Page របស់ហាងកាហ្វេមួយនេះបាន 11:11 Café ៕