ពេល​អ្នក​ឃ្លាន​នៅ​យប់​ត្រជាក់​និង​មាន​ខ្យល់​បក់​ល្វើយៗ​បែប​នេះ វា​ច្បាស់​ណាស់​ថា​អ្នក​ចង់​បាន​របស់​ណាក្តៅៗ​ញ៉ាំដើម្បី​ឲ្យមានភាពកក់ក្តៅ។ ចឹងលើកនេះFoodBuzz សូមណែនាំកន្លែងមួយចំនួនដែលពេលបានញ៉ាំហើយធ្វើឲ្យអ្នកមានអារម្មណ៍កក់ក្តៅ។ ម្ហូបមួយមុខមួយដែលធ្វើឱ្យអ្នកគិតដល់ការមើលថែ ថ្នាក់ថ្នមពីមនុស្សជាទីស្រឡាញ់។ តើបងប្អូនគិតឃើញនៅថាអត្ថបទនេះចង់និយាយពីអីនោះ?

អត្ថបទនេះនឹងណែនាំអ្នកពីកន្លែងលក់បបរ 10 ដែលអ្នកអាចទទួលបានបបរឆ្ងាញ់ និងក្តៅៗនាពេលរាត្រី។

#​1 ម៉ាន់ជូ

ម៉ាន់ជូ ជាហាងមួយដែលមានលក់ម្ហូបបែប សិង្ហបុរី-ម៉ាឡេស៊ី ចឹងបានម្ហូបរបស់ហាងនេះមានរសជាតិប្លែកជាងអ្វីដែលយើងធ្លាប់ញ៉ាំ។​ នៅខាងគាត់នេះមានលក់តាំងពីបន្លែឆា ដល់ប្រហិតដែលធ្វើខ្លួនឯង។​ ប៉ុន្តែមានម្ហូបមួយមុខដែលគេពេញនិយមជាងគេ​ ម្ហូប​នោះ​នឹង​ជា​ឈុត «​បបរសជាមួយនឹងខកង្កែប»។ គ្រាប់បបរ​កិន​រៀងមដ្ឋជាងបបរទូទៅ​ ហើយ​ឈុតវានិយមមកជាមួយខកង្កែប​ ដែលមានមាន​២​រសជាតិ​គឺ​១​ជារសជាតិ​ខជាមួយ​ម្ទេស និង​១​ទៀត​ខជាមួយ​ខ្ញី​។ មុខម្ហូបរបស់ ម៉ាន់ជូ គឺឆ្ងាញ់ ហើយប្លែកទៀត ជាពិសេសនៅពេលយប់នេះឯង។

ទីតាំង៖ ម៉ាន់ជូ

#2 Geylang Lor 9 

Geylang Lor 9 មានដើមកំណើតនៅប្រទេសសិង្ហបុរី។ ទាំងម្ហូប និងទឹកជ្រលក់គឺសុទ្ធតែជារូបមន្តរបស់ប្រទេសសិង្ហបុរីទាំងអស់។ រសជាតិសម្បូរបែបគឺសាកសមសម្រាប់មនុស្សគ្រប់វ័យជាពិសេសសម្រាប់អ្នកចូលចិត្តរសជាតិរឿងហហ្នឹងឯង។បបរកន្លែងនោះដាក់សុទ្ថតែឆ្នាំងដី ហើយខកង្កែបក៏ដូចគ្នា យកមកក្ដៅៗតែម្ដង។រសជាតិវិញកប់ ទឹកខ​ក្រាស់ ផ្អែម ហើយ​ហឹរ​ទៀត សាកសមបំផុតពេលដែលយើងញ៉ាំពេលយប់ ឬញ៉ាំ​បន្ទាប់​ពី​ជប់លៀងអី ដាក់ទៅក៏អាចស្វាងបន្តិចដែរ។

ទីតាំង៖

1. ទួលគោក៖ Geylang Lor 9 TK
2. បឹងកេងកង៖ Geylang Lor 9 BKK
3. Eden: Geylang Lor 9 EDEN

#3 បបរស ខ កង្កែប៩៩៩

បបរស ខ កង្កែប៩៩៩ ជាកន្លែងលក់អាហារមួយដែលមានទីតាំងនៅលើចិញ្ចើមផ្លូវ ហើយបើកន្លែងគាត់នេះបើកលក់តែពេលយប់ប៉ុណ្ណោះ។ គាត់​មានមុខម្ហូបឆ្ងាញ់​ៗ​ច្រើន​ដូច​ជា​បាយ មី តែ​អ្វី​ដែល​លក់ដាច់​ជាង​នោះ​គឺ​បបរ​ខកង្កែប។ លើសពីនេះទៀតគឺម្ហូបនៅកន្លែងនោះមានតម្លៃសមរម្យណាស់។

ទីតាំង៖ បបរស ខ កង្កែប៩៩៩

#4 ហេង ហេង

ហេង ហេង មានលក់មុខម្ហូបបែបចិនជាច្រើនមុខ ព្រោះម្ចាស់ហាងជាជនជាតិចិន។ កាល​ពី​​មុន ហេង​ហេង​ត្រូវ​បាន​គេ​ស្គាល់​ច្រើន​ដោយសារ​បបរសនិង​សាច់ជ្រូកផាក់ឡូវរបស់គាត់ ដែល​ទាក់ទាញ​មនុស្ស​គ្រប់​វ័យទាំងអស់។ អាហាររបស់គាត់មានរសជាតិស្រទន់ និងស្រាល ប្រៃ ផ្អែមឡមៗ ហើយបើអ្នកដែលចូលចិត្តចេញទៅក្រៅ និងញ៉ាំនៅពេលយប់អី គឺត្រូវម៉ាច់តែម្ដង។

ទីតាំង៖ ហេង ហេង

#5 សុធាបបរសស្លឹកតយ

រាល់យប់ពេលដែលផ្សារបិទ គឺដល់ពេល​តូប​លក់​អាហារ​ពេល​យប់​នៅ​ទួល​ទំពូងចេញមុខម្ដង។​ ខុសពីបបរនៅកន្លែងផ្សេង បបរកន្លែងគាតើនេះក៏ជាបបរសដែរប៉ុន្តែមិនមែនសសុទ្ធទេ តែបបរស្លឹកតយ។​ ដោយសារតែកន្លែងនោះមានលក់បបរត្រីខដែល ត្រីខនៅទីនោះ​ផ្អែម ផាក់ឡូវ ខ្ទឹមជ្រក់ ម្ទេសជ្រក់ បាក់យ៉ុង អីហ្នឹង និង​រសជាតិពេលញ៉ាំទៅមានអារម្មណ៍ដូចកាលដែលយើងនៅពីក្មេងចឹង។ កន្លែងនោះបើកលក់តែនៅពេលយប់ទេ ចូលចិត្តញ៉ាំបបរពេលយប់ ហើយរសជាតិប្លែក ហើយធូរថ្លៃទៀតទៅៗត្រូវហើយ។

ទីតាំង៖ សុធាបបរសស្លឹកតយ

#6 បបរស លឹមទ្រី 

លឹមទ្រី បបរស គឺជាភោជនីយដ្ឋានមួយក្នុងចំនោមភោជនីយដ្ឋានជំនាន់ចាស់ ពួកគេមានអាហារប្រកបដោយផាសុកភាព មនុស្សភាគច្រើនដែលបានទៅទីនោះតែងតែត្រលប់ទៅទីនោះវិញ។ ដោយសារតែអាហារប្រពៃណីរបស់ពួកគេឆ្ងាញ់ ហើយរសជាតិនៅជាំប់មាតើរហូត។  ជាពិសេសបបរសធម្មតាហ្នឹងឯង ដែលនិយមមកជាមួយសាច់ជ្រូក និងសាច់ផាក់ឡូវ ឬបន្លែផ្សេងៗជាដើម។

ទីតាំង៖ លឹមទ្រី បបរស

#7 បបស ណារី ក្រោយផ្សារសូរិយា (24h)

កន្លែង​នេះ​ជាហាងលក់នៅផ្ទះធម្មតាទេ ប៉ុន្តែគាត់បើកលក់ដល់ទៅ​២៤​ម៉ោងឯណោះ។ កន្លែងនេះមានលក់មុខម្ហូបែបបខ្មែរជាច្រើនមុខដូចជា ពងទឹកប្រៃ ខសាច់ជ្រូក និងសណ្ដែកសៀង និងបន្ថែមពីលើម្ហូបពិសេសតែមួយគត់ ដែលជាបបរសនេះឯង។ កន្លែង គឺត្រូវណាស់សម្រាប់អ្នកដែលចូលចិត្តដើរលេងពេលយប់ និងសង់ទីម៉ង់ជាមួយនឹងបបរក្តៅៗ។

ទីតាំង៖ បបស ណារី ក្រោយផ្សារសូរិយា

#8 បបរស ហួរ ហាក់ 

ជាភោជនីយដ្ឋានមួយដែលមានម្ហូបបែបចិន ពួកគេមានមុខម្ហូបច្រើន ចាប់តាំងពីស៊ុបមាន់ខ្មៅរហូតដល់ពោះវៀនពោះតាំង។ ប៉ុន្តែអ្វីដែលគេនិយម ឬស្គាល់ជាងគេនៅកន្លែងនោះគឺ បបរស ជាមួយនឹងមុខម្ហូបពិសេសៗជាច្រើន សម្រាប់ជាមួយបបរ រើសម្ហូបមួយណាក៏ញ៉ាំទៅត្រូវមាត់ដែរ។ អ្នក​ដែល​ចូល​ចិត្ត​អាហារ​ទន់ៗ​ពេល​យប់​អី កន្លែងនេះមិនខុសទេ។

ទីតាំង៖ បបរស ហួរ ហាក់

#9 ពៅ វិមានឯករាជ្យ បបរមាន់ និងដូងក្រឡុក

ចុងក្រោយ​នេះ​នៅ​តែ​និយាយ​ពី​បបរ ប៉ុន្តែ​លើក​នេះ​វា​ខុស​ប្លែក​ពី​គេ។ លែងបបរសហើយ គឺបបរគ្រឿងវិញម្ដង កុំឲ្យថាអត់មានសោះ។ ពេញនិយមបំផុតជាមួយសាច់មាន់ ប៉ុន្តែបបរនេះក៏មានសាច់ ត្រី សាច់ជ្រូកអីដែរ។ មិន​ត្រឹម​តែ​បបរទេដែលពេញនិយមនោះ គឺគេមានដូងក្រឡុកដែលមនុស្សម្នាក់ៗតែងតែចូលចិត្ត។ ទាំងអាហារ និងភេសជ្ជៈមានរសជាតិឈ្ងុយឆ្ងាញ់ ស្រស់ៗ ថ្មីៗទៀត។ ពេញ​និយម​សម្រាប់​មនុស្ស​គ្រប់​វ័យ និង​អាច​ញ៉ាំបានគ្រប់​ពេល​ដែល​អ្នក​ប្រាថ្នា មានជាតិ​បំផុត​ពេល​ឃ្លាន​ពេល​យប់នេះឯង។

ទីតាំង៖ ពៅ វិមានឯករាជ្យ បបរមាន់ និងដូងក្រឡុក

#10  ស៊ីណនបបរមាន់ស្រែ

កន្លែងបបរគ្រឿងនេះពិសេសត្រង់ថាបបរគាត់នេះដាក់ដាំជាមួយទឹកមាន់ស្រែស្ងោសុទ្ធៗតែម្ដង។ រសជាតិគឺសមល្មម មិនបាច់ដាក់គ្រឿងថែមក៏ឆ្ងាញ់ដែរ ញ៉ាំទៅជាប់ចិត្ត ហើយ មិនទ្លាន់ទៀត។ មិនតែប៉ុណ្ណោះទេ កន្លែងគាត់នេះមានលក់ដល់យប់អាទ្រាតទៀត នឹកឃើញចង់ញ៉ាំបបរគ្រឿងកណ្ដាលយប់ដល់ចឹងបានត្រូវ។

ឥឡូវស្គាល់កន្លែងខ្លះហើយ សម្រាប់បងប្អូនណាចង់អង្គុយញ៉ាំបបរកណ្ដាលយប់អី មានគ្រប់ប្រភេទ។កន្លែងដែកអាចទទួលបានបបរឆ្ងាញ់ និងក្តៅនៅពេលយប់។ មានតាំងពីបបរដាក់ក្នុងផើងដីឥដ្ឋជាមួយបន្លែ និងសាច់ប្រភេទផ្សេងៗគ្នា បបរគ្រឿង រួមជាមួយនឹងសោភ័ណភាពខុសៗគ្នា។ ដែល​ជា​ជម្រើស​ដ៏​ល្អ​ឥត​ខ្ចោះ​សម្រាប់​អ្នក​ដែល​ចូល​ចិត្ត​ចេញ​ក្រៅ​ញ៉ាំ​អាហារ​ពេល​យប់អីហ្នឹង។