បើនិយាយពីភូមិកណ្ដាល ប្រហែលជាមិនអ្នកស្គាល់ពីភូមិនេះច្រើនឡើយ ព្រោះភូមិនេះជាតំបន់សប់ភីងតូចមួយ នៅកណ្ដាលក្រុងសៀមរាប ដែលមានហាងកាហ្វេស្អាតៗមានលក់វត្ថុអនុស្សាវរីយ៍ និងរបស់របរកែច្នៃពីសំរាមជាច្រើនដែរធ្វើអោយភ្ញៀវទេសចរបរេទេសភាគច្រើនចូលចិត្តទៅលេងតំបន់នេះ។

កន្លែងនេះជាកន្លែងដ៏ល្អសាកសមបំផុតសម្រាប់អ្នកចូលចិត្តអានសៀវភៅ និងធ្វើការក្នុងបរិយាកាសស្ងប់ស្ងាត់ ហើយស្រស់ថ្លាបែបសាមញ្ញ។ ការរៀបចំហាងមានពោរពេញទៅរូបថតអាល់បុមចម្រៀងខ្មែរ តាំងពីទសវត្សរ៍ទី ៥០-៦០ ជំនាន់លោកតា ស៊ិន ស៊ីសាមុត និងលោកយាយ រស់ សេរីសុទ្ធា ហើយចម្រៀង ដែលនៅក្នុងហាងទៀត គឺគេចាក់បទខ្មែរនិងបរទេសតាំងពីទស្សវត្សទី ៥០-៦០ ទាំងអស់។

កាហ្វេប្រចាំហាងភាគច្រើន ឆុងដោយដៃ និង ម៉ាស៊ីន ប៉ុន្តែលក្ខណៈពិសេសនោះគឺ គេមានរូបមន្ត បង្កើតកាហ្វេដោយខ្លួនឯងដែលខុសប្លែកពីគេ មានដូចជា មាន កាហ្វេ ឈីលីមូកា (កាហ្វេលាយជាមួយម្សៅម្ទេស) កាហ្វេ កូកូណាត់ ស៊ីណាមិនមូកា និង កាហ្វេ លេមុនក្រាស ជីនជ័រ ឡាតេ ជាដើម។

មិនតែប៉ុណ្ណោះ ហាងកាហ្វេនេះចូលរួមជួយថែរក្សាបរិស្ថានសង្គមទៀតផង ដោយការប្រើប្រាស់ទុយោធ្វើពីបំពង់ឬស្សី និងកែវថ្មសម្រាប់ដាក់កាហ្វេ ឬ ភេសជ្ជៈផ្សេងៗសម្រាប់ប្រើប្រាស់ក្នុងហាង ចំណែកឯការវេចខ្ជប់ទៅខាងក្រៅ គឺគេប្រើកែវក្រដាស និង បំពង់ក្រដាសជំនួសដោយកែវប្លាស្ទិច។ សម្រាប់អតិថិជន ដែលយកកែវមកខ្លួនឯង នឹងទទួលបានការបញ្ចុះតម្លៃ ២៥ សេនផងដែរ។

ក្រៅពីកាហ្វេ ទីនេះក៏មានលក់អាហារពេលព្រឹក និង ថ្ងៃត្រង់បែបខ្មែរ លោកខាងលិច ម្ហូបសុខភាព និងអាហារបួសផងដែរ​ ហើយក្រុមកាងារ FoodBuzz យើងបានភ្លក្សមុខម្ហូបពិសេសៗ ២-៣ មុខនៅទីនេះ។ តោះ ចង់ដឹងថាមានអីខ្លះអត់?

មុខម្ហូបដំបូងដែលពួកយើងបានសាកគឺ Omelette ដែលមានលាយជាមួយបន្លែចម្រុះសំបូរទៅដោយ សារធាតុចិញ្ចឹម ចំណែកឯ Toast Pesto មានរសជាតិឆ្ងាញ់ប្លែកជាមួយនឹងរសជាតិក្រូចឆ្មារតិចៗ និងឈ្ងុយដោយសារជីរណា មិនតែប៉ុណ្ណោះ ពួកយើងអាចបន្ថែម Bacon និង Egg បានតាមចំណង់ចំណូលចិត្ត ទៀតផង។ 

សម្រាប់ផ្នែកបង្អែម យើងបានភ្លក្ស  Dragon Smoothie និង Mango Smoothie តិចច្រលំថាភេសជ្ជៈក្រឡុក ទាំងពីរមុខជាបង្អែមផ្លែឈើស្រស់ៗដែលត្រូវបានណែនាំជាពិសេសតែម្ដង។

បើកពីម៉ោង៖ 7 ព្រឹក ដល់ 5 ល្ងាច (បិទរៀងរាល់ថ្ងៃពុធ)

តម្លៃ៖ 

 

• អាហារ៖ ចាប់ពី $2.25 

• ភេសជ្ជៈ៖ ចាប់ពី $2

 

ទីតាំង៖ ផ្លូវហាប់ក្វាន ភូមិមណ្ឌលមួយ (ភូមិកណ្ដាល ក្រោយធនាគារ J Trust Royal Bank) សង្កាត់ស្វាយដង្គំ ក្រុងសៀមរាប | Googlemap