FoodBuzz ជឿជាក់ថាប្រិយមិត្តទាំងអស់គ្នាតែងតែចង់បានអ្វីដែលថ្មី ជាពិសេសកន្លែងញ៉ាំអីនេះតែម្តង។ តែក៏បានត្រឹមមួយភ្លែត ហើយក៏ងាកមកញ៉ាំនៅកន្លែងដែលទៅជាប្រចាំវិញ ជាពិសេសបណ្ដាហាងបើកជាយូរឆ្នាំដែលធ្លាប់ទៅញ៉ាំជាមួយម៉ាក់ ឬប៉ាតាំងតូចៗ។ រំលឹកអនុស្សាវនីយ៍ចាស់ៗ នៅហាងទាំង 17 ដែលបានបើកដំណើរការអស់រយៈពេលជាង 10 ឆ្នាំជាងនេះទាំងអស់គ្នា។

#1​ សាច់គោអាំងយាយសក់ស

ហាងសាច់គោអាំងចង្កាក់ដ៏ល្បីឈ្មោះយាយសក់សត្រូវបានបើកដំណើរការឡើងតាំងពីឆ្នាំ 1984។ ហាងសាច់គោអាំងយាយសក់សមានទីតាំងស្ថិតនៅក្នុងតំបន់អ៊ូអរមួយផ្នែកនៃទីក្រុងភ្នំពេញ នោះគឺផ្សារតាប៉ាង។ អស់រយៈពេល 35 ឆ្នាំមកហើយហាងនេះនៅតែមានអតិថិជនចូលញ៉ាំសាច់គោអាំង​ ថ្លើមអាំងជាមួយនំបុ័ងនិងជ្រក់យ៉ាងអ៊ូអរមិនដែរដាច់។

នៅលើផ្លូវលេខ 51 ប្រិយមិត្តនឹងឃើញមានមនុស្សនៅតូបផ្សេងៗរវល់បក់ភ្លើងផ្សែងហុយទ្រលោមដើម្បីអាំងសាច់និងនំប៉័ងចាប់តាំងពីម៉ោងពេលអាហារថ្ងៃត្រង់។ ដោយសារតែមានហាងច្រើនលក់ដូចគ្នានេះហើយទើប​​ FoodBuzz ចង់រំលឹកកុំអោយភ្លេចមើលឈ្មោះហាងអោយបានត្រឹមត្រូវពេលទៅដល់។

តម្លៃ៖ ចាប់ពី 2,000៛

ម៉ោងបើក៖ ចាប់ពីម៉ោង 12 ថ្ងៃត្រង់ -​ 9 យប់

លេខទូរស័ព្ទ៖ 012 449 304/017 868 621/016 868 623/088 303 0530

ទីតាំង៖ ផ្លូវលេខ 51​ ម្តុំផ្សារតាប៉ាង សង្កាត់ផ្សារថ្មីទី 3 ខណ្ឌដូនពេញ | Googlemap 

#2 បាយស្រូបសាលាអង្គអេង

បាយស្រូបសាច់ជ្រូកគឺជាអាហារពេលព្រឹកដ៏មានប្រជាប្រិយបំផុតនៅក្នុងប្រទេសកម្ពុជា​ គឺវាមិនខាតពេលនឹងរកទិញ ដោយសារតែអាចរកទិញបាននៅគ្រប់ទីកន្លែង។ តែបាយស្រូបអង្គអេងជាកន្លែងពេញនិយមមួយដែលលក់បាយស្រូបសាច់ជ្រូក សាច់មាន់​ ខពងទាពេលព្រឹកអស់រយៈពេលជាង 30 ឆ្នាំហើយ។ កន្លែងលក់អាហារពេលព្រឹកនេះនៅតែមានភាពល្បីល្បាញទោះបីជាលក់មកយូរឆ្នាំប៉ុណ្ណាហើយក៏ដោយ គឺនៅតែមានអតិថិជនមករៀងរាល់ថ្ងៃ ធ្វើឱ្យវាក្លាយជាកន្លែងមួយដែលមមារញឹក និងលក់ដាច់បំផុតសម្រាប់អាហារពេលព្រឹក។

តម្លៃ៖ ចាប់ពី​ 4,000៛​

ម៉ោងបើក៖ ចាប់ពីម៉ោង 6 ព្រឹក

ទីតាំង៖ ផ្លូវលេខ 143 កែងផ្លូវ 300 (ខាងស្តាំមុខសាលាបឋមសិក្សាអង្គអេង) | Googlemap 

#3 អាហារដ្ឋានផ្លូវភ្លោះ

កន្លែងមមាញឹកមួយផ្សេងទៀតសម្រាប់អាហារពេលព្រឹកគឺនៅអាហារដ្ឋានផ្លូវភ្លោះជិតរង្វង់មូលវត្តសំពៅមាស។ FoodBuzz គិតថាពួកយើងភាគច្រើនអាចនឹងធ្លាប់ញ៉ាំបាយសាច់ជ្រូកនិងសាច់មាន់​ រឺក៏ Omelette របស់ហាងនេះកាលពីក្មេងៗព្រោះថាប៉ាម៉ាក់ពួកយើងទាំងអស់គ្នានឹងស្គាល់ហាងនេះភាគរយច្រើន។ ទោះបីជាបើកបានយូរឆ្នាំហើយ ក៏ភោជនីយដ្ឋាននៅតែមមាញឹករាល់ព្រឹកមានភ្ញៀវចូលមិនដាច់ដោយចូលមកញ៉ាំឬខ្ចប់យកទៅផ្ទះ។

នៅទីនោះ ទោះបីជាមិនមានកន្លែងទំនេរច្រើនសម្រាប់ចតរថយន្តក៏ដោយ FoodBuzz គិតថាដើម្បីអាហារឆ្ងាញ់ ជិះម៉ូតូទៅរឺហៅកង់បីទៅជុំគ្នាក៏មានក្តីសុខដែរមែនអត់?​

តម្លៃ៖ ចាប់ពី​ 12,000៛​

ម៉ោងបើក៖ ចាប់ពីម៉ោង 6 ព្រឹក

ទីតាំង៖ ផ្ទះលេខ 88 ផ្លូវ 214 កែង 141 សង្កាត់បឹងព្រលឹត (ជិតរង្វង់មូលសំពៅមាស) | Googlemap 

#4 ភោជនីយដ្ឋានទន្លេបាសាក់

ភោជនីយដ្ឋានទន្លេបាសាក់បានបើកដំណើរការតាំងពីឆ្នាំ​​ 1993 មកម្ល៉េះ។ វាជាភោជនីយដ្ឋានប៊ូហ្វេខ្នាតអន្តរជាតិដំបូងគេមួយនៅកម្ពុជា ហើយពួកយើងជឿថាអ្នករាល់គ្នាកាលពីនៅក្មេងយ៉ាងហោចណាស់ធ្លាប់បានទៅទីនោះម្ដង ឬពីរដងដែរជាមួយក្រុមគ្រួសារ ព្រោះថាទីនោះពិតជាកន្លែងពេញនិយមមែនទែនសម្រាប់អាហារប៊ូហ្វេជួបជុំគ្រួសារ។

នៅទីនោះមានបម្រើអាហារថ្ងៃត្រង់និងអាហារប៊ូហ្វេពេលល្ងាច រូមទាំងសេវាកម្មផ្សេងៗដូចជារៀបចំកម្មវិធីខួបកំណើត ជប់លៀង តុបតែងសេវាកម្មអាពាហ៍ពិពាហ៍ ហើយបច្ចុប្បន្នពួកគេមាន 2 សាខានៅភ្នំពេញ។

តម្លៃ៖ ចាប់ពី​ $7​

ម៉ោងបើក៖ អាហារថ្ងៃត្រង់និងពេលល្ងាច 10 ព្រឹក - 10 យប់

ទីតាំង៖

• កែងនឹងផ្លូវ 163 និងមហាវិថីម៉ៅសេទុង (245) | Googlemap 
• សាខាទី 2៖​ អគារលេខ 534, មហាវិថីព្រះមុន្នីវង្ស (ក្រោយពេទ្យបាយ័ន្ត និងជិតស្ពានព្រះមុន្នីវង្ស) | Googlemap 

#5 ហាង The Shop

ហាងនេះត្រូវបានបង្កើតឡើងក្នុងឆ្នាំ 2001 ដោយ Griet Lorré នៅតាមបណ្តោយផ្លូវ 240។ ជាច្រើនឆ្នាំកន្លងមកនេះ The Shop បានពង្រីកសាខាបានចំនួន 5 នៅភ្នំពេញដើម្បីបំពេញតំរូវការអតិថិជន។

ចាប់ពី Belgian Chocolate រហូតដល់នំ ម្ហូបបែបលោកខាងលិចនិងអាស៊ីគឺហាង The Shop អាចធ្វើបានទាំងអស់។ ក្រៅពីនោះ យើងអាចនិយាយបានថាសូកូឡារបស់ពួកគេត្រូវបានទទួលការគាំទ្រយ៉ាងខ្លាំងពីយុវវ័យ ជាពិសេសនៅពេលជិតដល់ថ្ងៃទិវានៃក្តីស្រឡាញ់និងថ្ងៃបុណ្យណូអ៊ែល គឺថាតែងតែមានការកុម៉្មង់ទិញសូកូឡាជាច្រើន។

តម្លៃ៖ ចាប់ពី​ $3

ម៉ោងបើក៖ អាហារថ្ងៃត្រង់និងពេលល្ងាច 6:30ព្រឹក - 7យប់

ទីតាំង៖ គ្រប់សាខាទាំងអស់របស់ The Shop

#6 Lucky Burger

FoodBuzz ដឹងថាអ្នករាល់គ្នាប្រាកដជាស្គាល់ហាងអាហារសម្រន់បែប Fast Food ក្នុងស្រុករបស់យើងនេះហើយ គឺឡាក់គីប៊ឺហ្គឺ។ ហាងអាហារបែប Fast Food ដំបូងបំផុតរបស់ប្រទេសកម្ពុជាត្រូវបានបើកដំណើរការឡើងតាំងពីឆ្នាំ1996 មកម្ល៉េះ។ ​ឡាក់គីប៊ឺហ្គឺរមានបម្រើនូវប្រភេទអាហារជាច្រើនប្រភេទដូចជាភីហ្សា បឺហ្គឺរ ដំលូងចៀន ការ៉េម និងមាន់ចៀនជាដើម។

ឡាក់គីប៊ឺហ្គឺក៏ទទួលបានការគាំទ្រពីភ្ញៀវបរទេសផងដែរ ដោយសារមានរសជាតិអាចទទួលបាន និងតម្លៃសមរម្យ។

តម្លៃ៖ ចាប់ពី​ $1.63

ម៉ោងបើក៖ 9AM – 9PM

ទីតាំង៖ គ្រប់សាខាទាំងអស់

#7 សុខមុំខគោបាក់ទូក

អ្នកណាមិនស្គាល់សុខមុំមីខគោនៅបាក់ទូក? ហាងគុយទាវនេះបានបើកដំណើរការអស់រយៈពេល 20 ឆ្នាំមកហើយដោយមានលក់ជូននូវស៊ុបគុយទាវឆ្ងាញ់ៗជាច្រើនប្រភេទដូចជា ខគោ, តុំយ៉ាំ, ស៊ុបនិងមីគ្រឿងក្នុង ផាក់ឡូវ និងសាច់ក្នុងតម្លៃសមរម្យបំផុត។

តម្លៃ៖ ចាប់ពី​ 7000៛

ម៉ោងបើក៖ 6AM – 8PM

ទីតាំង៖ ផ្លូវ​ 161 សង្កាត់អូរឬស្សីទី 2 ខណ្ឌ 7 មករា រាជធានីភ្នំពេញ (ជិតវិទ្យាល័យបាក់ទូក) | Googlemap 

#8 មីគាវសាច់ទារោងកុនអង្គរ

មើលតែផ្លាកក៏ដឹងថាហាងនេះបើកយូរប៉ុណ្ណាដែរ! ជាទូទៅមនុស្សភាគច្រើនពិតជាមិនសូវចូលចិត្តសាច់ទាទេ ព្រោះវាក្រាស់ស្វិត និងពិបាកទំពារ។ យ៉ាងណាមិញ អាហារដ្ឋានអង្គរនេះមានលក់មីទា មីគាវឆ្ងាញ់ណាស់ លាយជាមួយសាច់ទាទៀតគឺថាផុយស្រួលញ៉ាំមួយអ៊ែមតែម្តង។

ជាប់ចិត្តទាំងទឹកស៊ុប​ សរសៃមី​និងសាច់ទា ធានាថានិងហុតគ្រូកៗអស់ពីចាន។

តម្លៃ៖ ចាប់ពី​ 15,000៛

ម៉ោងបើក៖ 12 ថ្ងៃត្រង់ - 9 យប់

ទីតាំង៖ ផ្ទះលេខ 116Eo ផ្លូវហ្សាលដឹហ្គោល (217) ​ជាប់ធនាគារកាណាឌីយ៉ា | Googlemap 

#9​ ភោជនីយដ្ឋាន ម្លិះ

ស្ថិតនៅចំកណ្តាលរាជធានីភ្នំពេញ ក្បែរវិមានឯករាជ្យ ភោជនីយដ្ឋានម្លិះចាប់បើកនៅឆ្នាំ 2004 ហើយគោលបំណងនៃការបើកហាងនេះគឺដើម្បីការពារ និងថែរក្សាម្ហូបបែបប្រពៃណីខ្មែរ។

នៅម្លិះ ប្រិយមិត្តអាចញ៉ាំអាហារពេលព្រឹកដែលមានជាបបរ គុយទាវ រឺបាយ ហើយនៅទីនោះក៏មានលក់ជាអាហារថ្ងៃត្រង់និងអាហារពេលល្ងាចផងដែរ នៅសាខាទាំងពីរគឺភ្នំពេញនិងសៀមរាប។ ភោជនីយដ្ឋានម្លិះក៏មានជាបន្ទប់ឯកជនសម្រាប់ការជូបជុំពិភាក្សាការងារនិងកម្មវិធីផ្សេងទៀត។

តម្លៃ៖ ចាប់ពី​ $4

ម៉ោងបើក៖ 6AM – 9:30PM

ទីតាំង៖ Phnom Penh: #136 មហាវិថីព្រះមុន្នីវង្ស (41) សង្កាត់ទន្លេបាសាក់ ខណ្ឌដូនពេញ | Googlemap 

#10 បបរមាន់ទួលទំពូង

ដោយហាងមួយនេះ មិនមានផ្លាកហាង លោកអ្នកអាចនឹងពិបាករក! តែកុំបារម្ភ នៅលើផ្លូវ 155 មានតែហាងមួយនេះគត់ដែលមានមនុស្សកុះករចូលញ៉ាំ។ សម្រាប់ហាងនេះ បានបើកអាជីវកម្មជាងទសវត្ស ហើយក៏បន្ដរក្សាកេរ្ដិ៍ឈ្មោះផងដែរ។ ពីមួយជំនាន់ទៅមួយជំនាន់ អ្នកទួលទំពូលស្គាល់ និងដឹងរសជាតិច្បាស់តែម្ដង។

ម៉ោងបើក៖ 5AM – 10PM

តម្លៃ៖ ចាប់ពី 5,000៛

ទីតាំង៖ ខាងជើងផ្សារទួលទំពូង ផ្លូវ 155 សង្កាត់ទួលទំពូង ខណ្ឌចំការមន រាជធានីភ្នំពេញ | Googlemap

#11 អាហារដ្ឋានបាត់ដំបងថ្មី

បើនិយាយពីញ៉ាំតជំនាន់ អាហារដ្ឋានបាត់ដំបងថ្មី រឹតតែមិនអាចបាត់បាន! ច្បាស់ជាធ្លាប់ម៉ាក់ និងប៉ាកាន់ដៃចូលញ៉ាំគុយទាវ ឬឌីមស៊ាំតម្លៃត្រឹម ​2,500 រៀលក្នុងមួយចាន (តម្លៃបច្ចុប្បន្ន)។

ម៉ោងបើក៖ 3AM – 7PM

ទីតាំង៖ #66Eo វិថីសុកហុក (107) កែងនឹងមហាវិថី ហ្សាឌឺហ្គោល (217) សង្កាត់ផ្សារអូរឬស្សី ខណ្ឌ 7 មករា រាជធានីភ្នំពេញ | Googlemap 

#12 ហាងនំប៉័ងបាយ័ន

ទៅណាទៅណី ឬធ្វើដំណើរទៅតាមខេត្ត មិនអាចរំលងនំប៉័ងជាច្រើនប្រភេទនៅហាងនំប៉័ងបាយ័នដែលបើកតាំងពីឆ្នាំ 1998 នេះបានឡើយ។ នំប៉័ងបាក់យ៉ុង នំ​ប៉័ងប៊ឺរ នំខេក និងជាច្រើនទៀតសុទ្ធតែស្នាដៃក្នុងស្រុកតែម្ដង។

ម៉ោងបើក៖ 4AM – 10PM

ទីតាំង៖ គ្រប់សាខាទាំងអស់

#13 គុយទាវកំពង់ត្រាំ

ពេញនិយមបំផុតសម្រាប់ការទទួលទានជាអាហារពេលព្រឹក! គុយទាវកំពង់ត្រាំបើកជាច្រើនឆ្នាំនៅម្ដុំទួកស្វាយ អ្នកមិនស្គាល់។ នៅទីនេះ មានបម្រើអាហារពេលព្រឹកជាច្រើនជម្រើសរាប់ពីគុយទាវ បាយសាច់ជ្រូក សាច់មាន់ និងជាច្រើនទៀត។

ម៉ោងបើក៖ 7AM - 6PM

ទីតាំង៖ ផ្លូវ 193 កែងនឹងផ្លូវ 388 សង្កាត់ទួលស្វាយព្រៃ ខណ្ឌចំការមន រាជធានីភ្នំពេញ | Googlemap 

#13 កំពង់ត្រាំ អាយ-ប៊ី

បើជាច្រើនឆ្នាំហើយ កំពង់ត្រាំ អាយ-ប៊ី មានបម្រើអាហារពេលព្រឹកដូចជាគុយទាវ បាយសាច់ជ្រូក សាច់មាន់ និងអាហារជាច្រើនទៀត។ អ្នករស់នៅម្ដុំទួលស្វាយព្រៃប្រាកដជាស្គាល់ពួកគេច្បាស់ជាមិនខាន!

ម៉ោងបើក៖ 7AM – 6PM

ទីតាំង៖ ផ្លូវ 193 កែងនឹងផ្លូវ 388 សង្កាត់ទួលស្វាយព្រៃ ខណ្ឌចំការមន រាជធានីភ្នំពេញ | Googlemap

#14 ស្រីនាងគុយទាវ

ចាប់ផ្ដើមពីមុខរបរតូចមួយ តែបច្ចុប្បន្នឡើងដល់ផ្ទះ 2 ល្វែង ស្រីនាងគុយទាវពិតជាមានការគាំទ្រយ៉ាង​ច្រើនទៅលើរសជាតិគុយទាវជាមួយប្រហិតសាច់ត្រី។

ម៉ោងបើក៖ 5AM – 1PM

ទីតាំង៖ ព្រះអង្គអេង (13) កែងនឹងព្រះអង្គដួង (110)​ សង្កាត់ផ្សារចាស់ ខណ្ឌដូនពេញ | Googlemap 

#15 ហ៊ួរ យ៉ីន

ល្បីខាងប្រហិតត្រី ដែលមានរសជាតិឆ្ងាញ់ និងស៊ីគ្នាជាមួយគុយទាវ និងប្រភេទស៊ុបផ្សេងៗទៀតផងដែរ។ ទៅដល់ម្ដុំផ្សារកណ្ដាល អ្នកនឹងឃើញមានមនុស្សយ៉ាងច្រើនកុះករនៅផ្លូវ 55 តែម្ដង។

ម៉ោងបើក៖ 7AM – 6PM

ទីតាំង៖ ផ្លូវ 55 សង្កាត់ផ្សារកណ្ដាល ខណ្ឌដូនពេញ រាជធានីភ្នំពេញ | Googlemap 

#16 លត ឆា កាពីតូលចាស់

លត ឆា កាពីតូលចាស់់ ត្រូវបានបើកយូរចាស់កាលហើយ តែឲ្យតែរសៀលដឹងតែមនុស្សច្រើនសឹងតែអត់កន្លែងអង្កុយ។

ម៉ោងបើក៖ 11AM – 9:30PM

ទីតាំង៖ #114 ផ្លូវ 148 សង្កាត់ផ្សារកណ្ដាល ខណ្ឌដូនពេញ រាជធានីភ្នំពេញ | Googlemap

#17 មីឆារោងកុនអង្គរ

មីឆារោងកុនអង្គរអ្នកណាៗដ៏ស្គាល់ដែរ ជាពិសេសអ្នកដែលចូលចិត្តដើរលេងយប់ជ្រៅអីហ្នឹង ដឹងតែឃ្លានយប់ឡើង មកទីនេះមិនខាន។ ទាំងមីឆាមានរសជាតិឆ្ងាញ់ តម្លៃសមរម្យ និងមានអាហារជាច្រើនប្រភេទឲ្យជ្រើសរើសទៀតផងដូចជាសៀវម៉ៃ មីឆា គុវទាវឆា និងស៊ុប។

ម៉ោងបើក៖ 5:30PM

ទីតាំង៖ វិថីហ្សាឌឺហ្គោល (217) សង្កាត់អូរឬស្សី ខណ្ឌ 7 មករា រាជធានីភ្នំពេញ | Googlemap