បើនៅផ្ទះមានទូទឹកក កែវ ឬ ពុម្ពការ៉េម និងគ្រឿងផ្សំតែប៉ុន្មានមុខ មានដឹងអត់ថាអាចធ្វើការ៉េមឆ្ងាញ់ៗញ៉ាំបាន? តោះ! FoodBuzz នឹងណែនាំប្រភេទការ៉េមមួយចំនួន ដែលលោកអ្នកអាចធ្វើបានដោយខ្លួនឯងនៅផ្ទះ ជាមួយនឹងរូបមន្តងាយៗ។

#1 ការ៉េមចេក

គ្រឿងផ្សំ ៖

ផ្លែឈើ (តាមជម្រើស ជាទូទៅគេប្រើ ចេកទុំ ខ្នុរទុំ ដូងខ្ចី ឬ ផ្លែមៀន) សណ្តែកដីលីង ១ ចាន ទឹកដោះគោ ១/២កំប៉ុង  ខ្ទិះដូង ១/២គក ម្សៅឆា ទឹកដោះគោខាប់​ ស្ករស អំបិល

> ចេកទុំ ១/២ស្និត (ប៉ន់ឲ្យបែក)

> ខ្នុរទុំ ១ ដុំ (បេះជាសរសៃៗ)

> ដូងខ្ចី ១ ផ្លែ (កោសសាច់ជាបន្ទះៗ)

> ផ្លែមៀន ១ ចាន (បេះយកគ្រាប់ចេញ)

របៀបធ្វើ ៖

> កូរខ្ទិះដូងលើភ្លើងឲ្យពុះ (ដាក់ម្សៅឆា ១ ស្លាបព្រា ទឹកដោះគោខាប់ ១/២ ចានចង្កឹះ អំបិល ១/២ ស្លាបព្រា ស្ករស) ភ្លក្សមើលរសជាតិតាមចំណូលចិត្ត

> ចាក់ផ្លែឈើ និងសណ្តែកដីចូល ហើយកូរចូលគ្នាឲ្យសព្វ

> ទុកឲ្យត្រជាក់ រួចដាក់ក្នុងកែវ/ប្រអប់/ថង់ ហើយទុកឲ្យកក។

#2 ការ៉េមយ៉ាអួ

គ្រឿងផ្សំ ៖

ទឹកដោះគោស្រស់ ទឹកដោះគោខាប់ ១ កំប៉ុង យ៉ាអួ ១ កំប៉ុង​ (១៣០-១៥០មល) ទឹកក្តៅ

***បើអ្នកចង់ដាក់រសជាតិបន្ថែម អ្នកក៏អាចដាក់ទឹកផ្លែឈើតាមចំណូលចិត្តផងដែរ (គួរប្រើទឹកផ្លែឈើស្រស់ ដែលកិនចេញពីផ្លែឈើ)

របៀបធ្វើ ៖

> ចាក់ទឹកដោះគោខាប់ ១ កំប៉ុងចូលទៅក្នុងឆ្នាំង

> ចាក់ទឹកដោះស្រស់ ១ កំប៉ុង ទឹកក្តៅ ១ កំប៉ុង (វាល់ជាមួយនឹងកំប៉ុងទឹកដោះគោខាប់)

> ចាក់យ៉ាអួចូលទៅក្នុង រួចកូរឲ្យសព្វ ហើយដាក់ឲ្យកកជាការស្រេច

#3 ការ៉េមយាអួក្រឡុកជាមួយផ្លែឈើ

គ្រឿងផ្សំ ៖

ទឹកដោះគោស្រស់ យ៉ាអួ ទឹកឃ្មុំ ឬ ទឹកស្ករ ផ្លែឈើ (តាមចំណូលចិត្ត)

របៀបធ្វើ ៖

> ចិតផ្លែឈើជាចំណិតតូចល្មម រួចដាក់ទៅក្នុងម៉ាស៊ីនក្រឡុក

> ចាក់ទឹកដោះស្រស់ប្រមាណ ៣០០ មល យ៉ាអួ ៣-៤ ស្លាបព្រាបាយចូល រួចក្រឡុកចូលគ្នាឲ្យសព្វ

> ចាក់ទឹកឃ្មុំ ១ ស្លាបព្រាបបាយចូល ឬ ច្រើនជាងនេះ ប្រសិនបើអ្នកចូលចិត្តផ្អែម

> ក្រឡុកម្តងទៀតឲ្យសព្វ ហើយដួសដាក់ទុកឲ្យកកជាការស្រេច។

#4 ការ៉េមជាមួយនឹងភេសជ្ជៈ

ងាយៗមែនទែន គ្រាន់តែចាក់ភេសជ្ជៈ (អាចជាទឹកផ្លែឈើកិន ទឹកផ្លែឈើកំប៉ុង កូកា​) ទៅក្នុងកែវ ឬ ពុម្ពការ៉េម ហើយទុកឲ្យកក ជាការស្រេច។

***អាចចិតចំណិតផ្លែឈើដាក់ជាមួយ ឬ បើចូលចិត្តផ្អែម អាចដាំទឹកស្ករលាយជាមួយផងដែរ

#5 សាំងវ៉ិចការ៉េម

***មួយមុខនេះ រាងខុសពីគេបន្តិច​ ព្រោះយើងមិនមែនធ្វើការ៉េមទេ គឺគ្រាន់តែច្នៃ

គ្រឿងផ្សំ៖

ការ៉េម នំ Biscuit (ប្រភេទនំដុត/ធុង សំប៉ែតៗ ឬមូលៗ)

វិធីធ្វើ ៖

រៀបដូចសាំងវ៉ិចអញ្ចឹង ដោយគ្រាន់តែដាក់ការ៉េមនៅចន្លោះនំ ២ ហើយញ៉ាំ!