មាន់បំពងជាម្ហូបយ៉ាងពេញនិយម! ប្រិយមិត្តអ្នកអានភាគច្រើនប្រាកដជាធ្លាប់បានញ៉ាំមាន់បំពងបែបអឺរ៉ុប និងបែបកូរ៉េរួចហើយ តែមិនសូវមានអ្នកដែលធ្លាប់បានញ៉ាំមាន់បំពងបែបជប៉ុនពីមុនទេ! ថ្ងៃនេះ FoodBuzz សូមនាំប្រិយមិត្តឱ្យបានស្គាល់ហាងសាច់មាន់ជប៉ុន តម្លៃយ៉ាងសមរម្យ និងទីតាំងស្ថិតនៅកណ្ដាលក្រុងភ្នំពេញតែម្ដង។ 

ហ្វេនមាន់បំពងជប៉ុនម្នាក់ណាក៏ស្គាល់ Crown Chicken ដែរ! ហាងនេះល្បីខាងធ្វើ Karaage ឬ គេតែងស្គាល់ថាមាន់បំពងជប៉ុន យ៉ាងឆ្ងាញ់ជាប់ចិត្ត។ អ្វីដែលធ្វើឱ្យហាងនេះក្លាយជាទីពេញនិយមនោះគឺ សាច់មាន់ផុយល្អ និងមានរសជាតិឆ្ងាញ់ជាប់មាតិ និងថែមទាំងមានតម្លៃយ៉ាងសមរម្យ! សាច់មាន់បំពងមួយចានមានតម្លៃមធ្យម ពី $2.00 ទៅ $3.00 តែប៉ុណ្ណោះ។ មិនងាយរកបានទេ​ហាងឆ្ងាញ់ហើយថោកអ៊ីចឹង។​ 

មាន់បំពងបែបជប៉ុនពិសេសត្រង់ណា? មាន់បំពងដែលគេនិយមហៅថា Karaage នេះជាមាន់ដែលបានប្រឡាក់គ្រឿងរួច មុនពេលយកវាទៅបំពងជាមួយសំបកយ៉ាងស្ដើង ដើម្បីឱ្យយើងភ្លក្សរសជាតិយ៉ាងឆ្ងាញ់ នៃសាច់មាន់ដ៏ទន់ផុយ។ សាច់មាន់ដែលប្រឡាក់ មុនយកទៅបំពងនេះ មានរសជាតិមុតជាងសាច់មាន់ធម្មតា។ 

Crown Chicken មានមុខម្ហូបជាច្រើនជម្រើសសម្រាប់ឱ្យប្រិយមិត្តជ្រើសរើសទៅតាមចំណង់ចំណូលចិត្ត ប៉ុន្តែ ដើម្បីងាយស្រួលក្នុងការកុម្ម៉ង់ ថ្ងៃនេះ FoodBuzz សូមណែនាំមុខម្ហូបចំនួន 3 ដែលយើងចូលចិត្តខ្លាំង។ មុខម្ហូបទីមួយគឺជាមុខម្ហូបប្រចាំហាងតែម្ដង! Chicken Nanban មានលាបជាមួយទឹកសស tartar បានរសជាតិយ៉ាងមុត និងឆ្ងាញ់ប្លែកមាត់។ សាច់មាន់បំពងមួយចាននេះក៏មានដំឡូង និងសាឡាដមកជាមួយដើម្បីញ៉ាំជាមួយសាច់មាន់នេះ។ 

មុខម្ហូបដែលលក់ដាច់មួយទៀតគឺ Osaka Karaage ជាមួយសសថាកូយ៉ាគីនិងម៉េយ៉ូ។ មើលគ្រឿងផ្សំទៅទំនងប្លែក ប៉ុន្តែមានរសជាតិឆ្ងាញ់ខ្លាំង ជាមួយកំទេចប៉ូនីតូយ៉ាងពិសេស។ Garibata Chicken​ Steak ជាស្តេកសាច់មាន់ មានដាក់គ្រឿងជាមួយបឺរនិងខ្ទឹមស យ៉ាងឈ្ងុយជាប់ច្រមុះ ស្រួលញ៉ាំ ជាមួយបាយយ៉ាងជាប់ចិត្ត។​ 

សាច់មាន់ដែលមានលក់នៅហាង​ Crown Chicken ជាប្រភេទសាច់មាន់ដែលមានរសជាតិមុតខ្លាំង ដែលអាចញ៉ាំជាមួយ Asahi។ ថ្មីៗនេះ បៀរជាមួយសាច់មាន់បំពងក៏ជាការរួមផ្សំយ៉ាងពេញនិយម។ បើបានញ៉ាំជាមួយស្របៀរ Asahi ជាមួយសាច់មាន់នៅ Crown ពិតជាឆ្ងាញ់ មានស្រាបៀរជួយកាត់ជាតិខ្លាញ់ និងជួយឱ្យបង្កើនរសជាតិនៃសាច់មាន់ថែមទៀត។ 

បើឃ្លាននូវសាច់មាន់បំពងបែបជប៉ុនរបស់ Crown Chicken កុំភ្លេច Asahi Super Dry ដែលទៅបន្ថែមរសជាតិអាហាររបស់លោកអ្នកឲ្យកាន់តែមានឱជារស។