ផ្ទះអ្នកខ្លះ ប្រាកដជាឧស្សាហ៍ទិញចេកទុកសែន ឬ ញ៉ាំជាប្រចាំហើយ ហេតុនេះហើយ បើមិនច្នៃជាម្ហូបឲ្យប្លែកមុខខ្លះទេ ខ្លាចលោតែទុំជោរចោលពេញហ្នឹងណាស់។ ដើម្បីកុំឲ្យវាជាកង្វល់ មករៀនធ្វើជាមួយនឹងរូបមន្តងាយៗខាងក្រោមនេះ ក្រែងលោបានប្រើប្រាស់ធនធានឲ្យអស់ពីលទ្ធភាពខ្លះ។

#1 ចេកអាំង ទឹកខ្ទិះ

>>>គ្រឿងផ្សំ

- ចេកណាំវា (ទុំ) 1 ស្និត

- សាច់ដូងខ្ចី កោសជាសរសៃ 1 កូនចានចង្កឹះ

- ស្ករក្រហម 3 ខាំ (ស្ករសក៏បាន)

- អំបិល 1 ស្លាបព្រាកាហ្វេ

- ខ្ទិះដូង 250 មល

>>> វិធីធ្វើ

- បកចេក ហើយដាក់អាំង

- រំងាស់ស្ករ អំបិល និងខ្ទិះដូង ឲ្យពុះសព្វ រហូតឡើងខាប់តិចៗ សឹមដាក់សាច់ដូងចូល រួចកូរមួយស្របក់

- សង្កត់ចេកអាំងឲ្យសំប៉ែត ហើយចាក់ទឹកខ្ទិះពីលើ ពេលញ៉ាំ។

#2 ចេកចៀន

>>>គ្រឿងផ្សំ

- ចេកណាំវ៉ា 2-3 ស្និត

- ម្សៅបំពង 200ក 

- ស្ករស 120ក, អំបិល 1 ស្លាបព្រាកាហ្វេ, ល្ង ½ កូនចាន, ទឹកលាយកំបោរ 2-3 ស្លាបព្រាបាយ

- ស្លឹកតើយ 5-6 សន្លឹក 

- ទឹកឆ្អិន 200-250មល

>>>វិធីធ្វើ

- លាយម្សៅបំពង ស្ករស អំបិល ចូលគ្នាឲ្យសព្វ > ដាក់ទឹកកំបោរ និងទឹកឆ្អិនចូល លាយឲ្យសព្វ > ដាក់ល្ងចូល ច្របល់ចូលគ្នា 

- បកសំបកចេក រួចពុះជា 2-3 ចំណែក > ដាក់ចូលម្សៅ ច្របល់តិចៗ ឲ្យចូលគ្នាសព្វល្អ 

- ចៀនឲ្យក្រៀមល្មមតាមចំណូលចិត្ត។

#3 ចេកហាល

>>>គ្រឿងផ្សំ៖ ចេកទុំ ទឹកអំបិល

>>>វិធីធ្វើ

- បកចេក ហើយដាក់ត្រាំទឹកអំបិលប្រមាណ 10 នាទី
- ស្រង់ចេញឲ្យស្រក់ទឹកអស់ រួចដាក់ហាលថ្ងៃរហូតដល់ក្រៀម។

#4 ចេកឆឹង

>>>គ្រឿងផ្សំ

- ចេកស្ទើរទុំ 2 ស្និត 

- ស្ករត្នោត 0.6គក

- កំបោរស 1 ស្លាបព្រាបាយ, ទឹក 3 លីត្រ

- អំបិល 1 ស្លាបព្រាកាហ្វេ, ខ្ទិះដូង 1 កូនចានចង្កឹះ

- សាច់ដូងចាស់ 1 ចំហៀងផ្លែ (កោសជាសរសៃធំៗវែង)

>>>វិធីធ្វើ

- កូរកំបោរសជាមួយទឹកចំនួន 3 លីត្រ ហើយទុកឲ្យឡើងរងថ្លា

- បកសំបកចេក រួចដាំត្រាំទឹកកំបោរថ្លា (4 ទៅ 5 ម៉ោង)

- កូរស្ករត្នោតលើភ្លើងឲ្យឡើងក្រហមព្រឿងៗ រួចចាក់ចេកចូល ហើយត្រឡប់ចុះឡើងៗរហូតដល់ដាច់ទឹក ឬ ស្ងួតទឹកអស់។

#5 ការ៉េមចេក

>>>គ្រឿងផ្សំ៖ ផ្លែឈើ (តាមជម្រើស ជាទូទៅគេប្រើ ចេកទុំ ខ្នុរទុំ ដូងខ្ចី ផ្លែមៀន) សណ្តែកដីលីង 1 ចាន ទឹកដោះគោ ½ កំប៉ុង  ខ្ទិះដូង ½ គក ម្សៅឆា ទឹកដោះគោខាប់ ស្ករស អំបិល

- ចេកទុំ ½ ស្និត (ប៉ន់ឲ្យបែក)

- ខ្នុរទុំ 1 ដុំ (បេះជាសរសៃៗ)

- ដូងខ្ចី 1 ផ្លែ (កោសសាច់ជាបន្ទះៗ)

- ផ្លែមៀន 1 ចាន (បេះយកគ្រាប់ចេញ)

>>>របៀបធ្វើ ៖

- កូរខ្ទិះដូងលើភ្លើងឲ្យពុះ (ដាក់ម្សៅឆា 1 ស្លាបព្រា ទឹកដោះគោខាប់ ½ ចានចង្កឹះ អំបិល ½ ស្លាបព្រា ស្ករស) ភ្លក្សមើលរសជាតិតាមចំណូលចិត្ត

- ចាក់ផ្លែឈើ និងសណ្តែកដីចូលក្នុង ហើយកូរចូលគ្នាឲ្យសព្វ

- ទុកឲ្យត្រជាក់ រួចដាក់ក្នុងកែវ/ប្រអប់/ថង់ ហើយទុកឲ្យកក។

#6 ចេកឆាប

>>>គ្រឿងផ្សំ

- ចេកណាំវ៉ាខ្ចី 1 ស្និត

- ទឹកកំបោរ, ប្រេងសណ្ដែក

- ស្ករស 1 កូនចាន ទឹកស្អាត កន្លះកូនចាន

- ប័រប្រៃ ឬ ប័រកំប៉ុង 2 ស្លាបព្រាបាយ

>>>វិធីធ្វើ

- បកសំបកចេក លាងទឹក រួចហាន់ជាចំណិតស្ដើងៗ > ដាក់ត្រាំទឹកកំបោរ 2 ទៅ 3 ម៉ោង > ស្រង់ទុកឲ្យស្រស់ទឹក

- ដាំខ្ទះឲ្យក្តៅដាក់ប្រេងសណ្តែកចូល > ដាក់ចេកបំពងឲ្យក្រៀមល្មម > ស្រង់ទុកឲ្យស្រស់ប្រេង

- ដាំខ្ទះប្រើភ្លើងក្ដៅល្មម ដាក់ស្ករស ទឹកស្អាត និងប័រចូល កូរឲ្យរលាយសព្វចូលគ្នា ទុកមួយរំពុះ 

- ដាក់ចេកបំពងចូល > កូរច្របល់ឲ្យសព្វល្អ។