ភ្លេចៗចូលឆ្នាំថ្មីជិតដាច់ខែមករាទៀតបាត់រដូវកាលប្រមូលលុយកាន់តែខិតជិតមកដល់ដែរគឺចូលឆ្នាំចិននេះឯង កូនខ្មែរស្រលាយចិនដឹងតែសប្បាយប្រមួលអាំងប៉ាវហើយឲ្យតែមានបុណ្យចូលឆ្នាំចិន។ ក្រុមគ្រួសារដែលមានស្រឡាយចិនមានទំនៀមទម្លាប់ក្នុងការធ្វើម្ហូបដើម្បីសែនជូនដល់ជីដូនជីតារបស់គេខ្លះ និងមានការជួបជុំគ្នាទទួលទានអាហារជាដើម។ នៅពេលមានបុណ្យចូលឆ្នាំប្រពៃណីចិនម្ដងៗភាគច្រើន គេតែងតែមានមុខម្ហូបទាំង ១២ នេះជាម្ហូបប្រពៃណី និងមានអត្ថន័យសម្រាប់តំណាងឲ្យមុខម្ហូបនីមួយៗ ព្រោះគេជឿថានាំសំណាងល្អក្នុងឆ្នាំថ្មីនេះ។

១. យីសាង / Yúshēng / 鱼生

Yusheng ឬ យីសាងគឺជាសាឡាត់ត្រីឆៅដែលពេញនិយមនៅក្នុងម្ហូបចិនកាតាំង។ ម្ហូប​នេះ​ធ្វើ​ដោយ​ត្រី​ឆៅ​លាយ​ជាមួយ​បន្លែ​ ​ទឹកជ្រលក់ និង​គ្រឿង​ផ្សំ​ជា​ច្រើន​មុខមានដូចជា ខ្ទឹមក្រហម និងបៃតង ការ៉ុត ខ្ញី ចំណិតខ្ទឹមបារាំង សណ្ដែកដី ផ្លែទទឹម ម្រេច សាច់មាន់ ប្រេង អំបិល ទឹកខ្មេះ ស្ករ និងជាច្រើនទៀតតាមចំណង់ចំណូលចិត្ត។ មុខម្ហូបមួយនេះត្រូវបានគេជឿថាតំណាងឲ្យនាំលាភ ទ្រព្យសម្បត្តិ និងអាយុវែង។

២. គាវ / Jiaozi / 饺子​​

គាវគឺជា​មុខម្ហូប​ដ៏​ពេញ​និយម​ក្នុង​ឱកាស​បុណ្យចូលឆ្នាំ​ថ្មី​ប្រពៃណី​ចិនជាពិសេស​នៅ​ភាគ​ខាងជើង​នៃ​ប្រទេស​ចិន​។ វាជានំចិនមួយប្រភេទ ដែលមានស្នូលខាងក្នុងជាសាច់ ឬបន្លែ បន្ទាប់មកគេយកទៅចំហុយ និងចៀនវាតាមចំណង់ចំណួលចិត្ត។ ហើយមួយវិញទៀតគេភាគច្រើនញាំុម្ហូបគាវនេះជ្រលក់ជាមួយទឹកស៊ីអ៊ីវ ដើម្បី៎ឲ្យកាន់តែមានជាតិថែមមួយកម្រិតទៀត។ មុខម្ហូបគាវនេះត្រូវបានគេជឿថា នឹងនាំមកនូវលាភសំណាងរកស៊ីមានបាន ព្រោះគាវទាំងនេះមានរាងស្រដៀងនឹងមាស ឬប្រាក់ ជារូបិយប័ណ្ណដែលគេប្រើក្នុងសម័យបុរាណ។

៣. គួង ឬគាវបំពង​ / Chūn Juǎn / 春卷

គួង គឺជាប្រភេទម្ហូបឌីមសាំរបស់ជនជាតិចិនកាតាំង ដែលគេមូលវាជាមួយសាច់ បន្លែ ឬស្នូលផ្អែម។ មុខម្ហូបនេះមានមានការនិយមខ្លាំងសម្រាប់ដាក់សែនអំឡុងពេលចូលឆ្នាំចិនជាពិសេសនៅភាគខាងកើតប្រទេសចិន រួមមាន ជាំងស៊ី ជាំងស៊ូ សៀងហៃ ហ្វូជៀន ក្វាងចូវ សិនជិន និងហុងកុង។ ការទទួលទានគួង ឬគាវបំពងនេះបើគិតតាមប្រពៃណីតំណាងឱ្យដុំមាស ហើយត្រូវបានគេជឿថានឹងនាំមកនូវទ្រព្យសម្បត្តិ និងភាពរុងរឿងនាពេលឆ្នាំខាងមុខនេះ។

៤. មីអាយុវែង / Chángshòu miàn / 长寿面

នៅក្នុង​វប្បធម៌​ចិន មីឆាជា​និមិត្តរូប​នៃ​អាយុ​យឺនយូរ ជា​សញ្ញា​នៃ​ការ​ប្រាថ្នា​ចង់​បាន​អាយុ​វែង និង​រុងរឿង។ នៅភាគខាងជើងប្រទេសចិន អាហារទាំងនោះត្រូវបានគេចាត់ទុកថាជាអាហារដ៏មានសក្តិសិទ្ធ ដែលគេនិយមដាក់សែនក្នុងថ្ងៃបុណ្យចូលឆ្នាំចិន ហើយគេជឿថាបើមីកាន់តែវែង កាន់តែអាយុច្រើន។ 

៥. ត្រី​ / Yú / 鱼

ក្នុង​វប្បធម៌​ចិន ត្រី​គឺជា​មុខម្ហូប​ប្រពៃណី​ក្នុង​មេនុយ​អាហារ​ពេល​ថ្ងៃ​ចូលឆ្នាំ​ចិន​។ ការបរិភោគត្រីត្រូវបានគេជឿថាការមានអតិរេកនៅចុងឆ្នាំនឹងនាំមកនូវសំណាងល្អបន្ថែម និងភាពរុងរឿងនាឆ្នាំខាងមុខនេះ។ ត្រីតំណាងឱ្យភាពបរិបូរណ៍ និងវិបុលភាព ហើយវាត្រូវបានគេចាត់ទុកថាជាម្ហូបដ៏មានសំណាងដែលនាំមកនូវសុភមង្គល និងសំណាងល្អដល់តុផងដែរ។

៦. ក្រូច / Júzi / 橘子

អ្នកទាំងអស់គ្នាប្រាកដជាឃើញគេដាក់សែនផ្លែឈើ តែដឹងតែមានផ្លែក្រូចជានិច្ច ហើយត្រូវអត់? ដោយសាតែក្រូច​ត្រូវ​បាន​គេ​ចាត់​ទុក​ជា​យូរ​ណាស់មក​ហើយ​ថា​ជា​និមិត្ត​សញ្ញា​ប្រពៃណី​ ​ជីន (金) / មាស។ ផ្លែឈើពណ៌ទឹកក្រូច និងក្រហមត្រូវបានគេចាត់ទុកថាភាព រុងរឿង សម្រាប់ជនជាតិចិនម៉្យាងប្រហែលជាដោយសារតែពណ៌ដ៏រស់រវើករបស់វាផងដែរ។ 

៧.​ បន្លែ / Pén Cài or Poon Choi / 盆菜  

Poon Choi ដែលត្រូវបានគេស្គាល់ផងដែរថាជា Pén Cài គឺជាអាហារដែលផ្សំឡើងពីស្រទាប់ជាច្រើននៃគ្រឿងផ្សំសំខាន់ផ្សេងៗគ្នាដូចជាផ្សិត ផ្លែប័រ គ្រឿងសមុទ្រ សាច់ បន្លែ និងគ្រឿងផ្សំជាច្រើនទៀត។ វាត្រូវបានគេដាក់នៅក្នុងឆ្នាំងដែកមួយ ក្នុងអំឡុងពេលសែនចូលឆ្នាំចិននេះ​ ហើយភាគច្រើនគេបរិភោគជាមួយគ្រួសារជាតំណាងឲ្យនិមិត្តរូបនៃការរួបរួមគ្នា។

៨. ​បង្គា / Xiā / 虾

បង្គា​ត្រូវ​បាន​គេ​ចាត់​ទុក​ថា ជា​និមិត្តរូប​នៃ​លាភ​សំណាង។ គេជឿថាការទទួលទានបង្គានាំមកនូវសុភមង្គល និងជោគជ័យក្នុងឆ្នាំថ្មី។ សញ្ញាណនៃសំណាងល្អនេះមាន​រួម​បញ្ចូល​ទាំង​ភាព​ចម្រុង​ចម្រើន ភាព​រីករាយ សុខភាព សំណើច ជោគជ័យ និង​ភាព​ប្រសើរ​ឡើង។

៩. មាន់ទាំងមូល / ជី / 鸡 និងទា / យ៉ា / 鸭

នៅក្នុងវប្បធម៌ចិន សាច់មាន់ និងទា ជាទូទៅត្រូវបានចៀន ឬអាំងសម្រាប់អាហារជួបជុំគ្រួសារហើយជាធម្មតាត្រូវបានចម្អិនជាមួយនឹងគ្រឿងផ្សំសាមញ្ញដូចជាខ្ញី ឬទឹកស៊ីអ៊ីវ។ តាមប្រពៃណីភាគច្រើនគេតែងតែសែនថ្វាយ មាន់ និងទាមួយក្បាលដល់បុព្វការីជន ដើម្បីប្រសិទ្ធពរជ័យ និងសុំការបួងសួង បន់ស្រន់។ 

១០.​ សាច់ជ្រូកបីជាន់ប្រឡាក់ជាមួយត្រាវ​ / Yùtou Hóngshāo Wǔhuāròu / 芋头红烧五花肉

មុខម្ហូបមួយនេះ គឺជាពេញនិយមមួយដែលត្រូវបានបម្រើជាទូទៅក្នុងពិធីបុណ្យចូលឆ្នាំចិននៅភាគខាងត្បូងប្រទេសចិន។ សាច់ជ្រូកតំណាងឱ្យជីវិតដែលមានភាពចម្រុងចម្រើន ទ្រព្យសម្បត្តិ រឹងមាំ និងពោរពេញដោយពរជ័យដ៏បរិបូរណ៍។ មុខម្ហូប​ជា​មធ្យោបាយ​បង្ហាញ​ពី​បំណង​ប្រាថ្នា​ឱ្យ​ក្នុង​ឆ្នាំ​ថ្មី​មាន​ភាព​ចម្រុងចម្រើន។

១១. នំអ៊ី / Tāng yuán / 汤圆

ទាំងអស់គ្នាប្រាកដជាដឹងហើយថានំអ៊ី គឺជាប្រភេទនំបង្អែមមួយដែលពេញនិយមក្នុងពិធីបុណ្យបង្ហោះគោមដែលគេហៅថា បុណ្យសែនលោកខែរបស់ប្រទេសចិនត្រូវអត់? ពេលបុណ្យចូលឆ្នាំចិនក៏គេមានសែននំប្រភេទនេះដែរ។ នំនេះតំណាងឱ្យការនៅជាមួយមនុស្សជាទីស្រលាញ់ និងការជួបជុំគ្រួសារ ដូច្នេះមិនបាច់ឆ្ងល់ថាហេតុអ្វីបានជាពួកគេពេញនិយមខ្លាំងនំនេះយ៉ាងដូច្នេះ!

១២. ​នំអង្ករដំណើប / Nián Gāo / 年糕 

នំនេះដែលត្រូវបានគេស្គាល់ថា "Nián Gāo / 年高" ក៏ជាបង្អែមដ៏ពេញនិយមនៅក្នុងម្ហូបចិនដែលផលិតពីម្សៅអង្ករដំណើបដែរ។ ទោះបី​វា​អាច​ទទួលទាន​បាន​ពេញ​មួយ​ឆ្នាំ​ក៏ដោយ ប៉ុន្តែ​វា​ជា​ទម្លាប់​ទទួលទាន​ក្នុង​ឱកាស​បុណ្យចូលឆ្នាំ​ចិន​។ ការទទួលទាន នំ “nián gāo” ត្រូវបានគេជឿថានឹងនាំមកនូវសំណាងល្អក្នុងអំឡុងពេលឆ្នាំនេះ ដែលមានន័យថាអ្នកនឹងមានភាពរុងរឿងក្នុងឆ្នាំនេះ។